Medıtsınalyq saqtandyrý qoryna 6 mln-ǵa jýyq adam atynan jarna aýdaryldy
ASTANA. QazAqparat - Saqtandyrý júıesi iske qosylǵaly beri, ıaǵnı 2017 jyldyń 1 shildesinen 2018 jyldyń 1 shildesine deıin 80,6 mlrd teńge jarna tústi. Bul týraly «Áleýmettik medıtsınalyq saqtandyrý qory» AQ basqarma tóraıymy Elena Bahmýtova málim etti, dep habarlaıdy QazAqparat Qordyń baspasóz qyzmetine silteme jasap.
«Áleýmettik medıtsınalyq saqtandyrý júıesiniń iske qosylǵanyna bir jyl toldy. Ótken jyldyń 1 shildesi men bıylǵy jyldyń 1 shildesine deıingi aralyqta túsken jarnanyń jalpy somasy 80,6 mlrd teńgege jetti. Jarnalar men aýdarymdar barlyǵy 5 mln 952 myń adamnyń atyna aýdarylǵan», - dedi Elena Bahmýtova Úkimet úıinde ótken baspasóz máslıhatynda.
Onyń aıtýynsha, qor tabys pen shyǵyndy teńgerimdi paıdalaný prıntsıpi boıynsha jumys isteıdi.
«Qazirgi tańda qor kepildendirilgen tegin medıtsınalyq kómek paketiniń operatory. Qazir respýblıkalyq bıýdjetten atalǵan kómekke bólingen qarajatty memlekettik tapsyrys alǵan medıtsına uıymdary arasynda bóliske salyp otyr. Bıyl kepildendirilgen tegin medıtsınalyq kómek paketine 924 mlrd teńge bólingen», - dedi E.Bahmýtova.
