Medıtsınalyq saqtandyrý qory jedel járdem aqysyn tolyq tólep otyr

ASTANA. QazAqparat - «Áleýmettik medıtsınalyq saqtandyrý qory» AQ 2018 jyldyń basynan beri halyqqa qyzmet kórsetken otandyq jedel járdem stantsııalaryna 22,4 mlrd teńge tóledi. Bıyl kepildendirilgen tegin medıtsınalyq kómek sheńberinde jedel járdem stantsııalarymen 31,5 mlrd teńgeniń kelisimsharty bekitilgen bolatyn. 1 qazanǵa deıin kórsetilgen somanyń 71 paıyzy tólengen. Bul týraly «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń baspasóz qyzmetinen habarlady.

Málimetke súıensek, Qor Batys Qazaqstan oblysyndaǵy «Oblystyq jedel medıtsınalyq járdem stantsııasy» mekemesimen 953,4 mln teńgege kelisimshart bekitken. 2018 jyly 1 qazanǵa deıin atalǵan uıymǵa 806 mln teńge aýdaryldy (jalpy somanyń 84,5 paıyzy).  Onyń ishinde ádette ustalyp qalatyn avans ta bar.

«Kórsetilgen qyzmet aqysy bekitilgen kelisim talaptaryna saı: qoldanystaǵy normatıvtik-quqyqtyq aktiler talaby boıynsha, tıisti merzimde tólenedi. Jumysshylarǵa jalaqyny der kezinde tóleý máselesi - árbir jedel járdem uıymynyń ishki isi jáne basshylyq pen menshik ıesiniń quzyretindegi sharýa», - dedi MSQ basqarma tóraǵasy mindetin atqarýshy Botagóz Jaqselekova.

Aıta keterligi, bıyl Densaýlyq saqtaý mınıstrligi jedel járdem júıesin reformalaýǵa kirisken bolatyn. Atalǵan reforma boıynsha jedeldigi jaǵynan 4-shi sanatqa jatatyn shaqyrtýlar jergilikti emhanalarǵa beriledi. Nátıjesinde qarjylyq jáne ózge de resýrstar emhanalar men jedel járdem stantsııalary arasynda qaıta bóliske túsedi. Sonymen qatar, Densaýlyq saqtaý mınıstrligi jedel járdem stantsııalarynyń menshik ıesi bolyp tabylatyn aımaqtyq densaýlyq saqtaý basqarmalarynyń ótinishi boıynsha jedel járdem qyzmetiniń tarıfterin kóterip, jyldyq bıýdjetti bólý shemasyn ózgertý týraly sheshim qabyldaǵan edi. Qarajat bıylǵy jyldan bóline bastady.

Qazirgi tańda Densaýlyq saqtaý mınıstrligi atalǵan sheshimderdi zańdastyryp jatyr. Qosymsha qarajat barlyq normatıvtik-quqyqtyq aktiler ókiletti organ tarapynan bekitilgennen keıin bólinetin bolady.

 «Medıtsınalyq saqtandyrý qory jaǵdaı rettelgenshe avansty ustamaı, qarjyny tolyq tóleý týraly sheshim qabyldady» - dedi B.Jaqselekova.

«Qor tegin medıtsınalyq kómek paketiniń operatory retinde tıisti sheshimder qabyldanǵanǵa deıin medıtsınalyq qyzmetterdi Densaýlyq saqtaý mınıstrligi bekitken tarıfter boıynsha satyp alýdy jalǵastyrady. Sonymen qatar, Qor medıtsına uıymdarynyń ishki qarjylyq máselelerine, sonyń ishinde jalaqy máselesine aralasa almaıdy», - delingen habarlamada.