Medıtsınalyq saqtandyrý qory jambyldyq klınıkalarǵa 39 mlrd teńge tóledi
«Bıylǵy jyldyń 10 jeltoqsanyndaǵy málimetke súıensek, jalpy Qazaqstan boıynsha qormen kelisimshart bekitken jetkizýshi kompanııalarǵa 662,4, mlrd teńge tólendi. Bul - kepildendirilgen tegin medıtsınalyq kómek paketi sheńberinde bekitilgen kelisimshart somasynyń 83% paıyzyn quraıdy. Jambyl oblysy boıynsha Qormen kelisimshart bekitken jetkizýshi kompanııalarǵa 39 mlrd teńge tólenip, bul kepildendirilgen tegin medıtsınalyq kómek paketi sheńberinde bekitilgen kelisimshart somasynyń 84,9 paıyzyn qurady», - dep túsindirdi «Áleýmettik medıtsınalyq saqtandyrý qory» KEAQ Jambyl oblysy boıynsha fılıalynyń dırektory Mavlıýda Bokaeva.
«Jumys kestege saı júrip jatyr, bólingen qarajat medıtsına mekemeleriniń operatsııalyq shyǵyndaryn óteýge jetkilikti», - deıdi M. Bokaeva.
Búgingi tańda jalpy Qazaqstan boıynsha Qor memlekettik tapsyrys boıynsha 1375 medıtsına uıymymen kelisimshart bekitken. Onyń 642-i - jeke menshik. Bıyl jeke klınıkalar sany 2017 jylmen salystyrǵanda 171-ge artqan.
Qazirgi ýaqytta Jambyl oblysynda 87 medıtsına uıymy qordyń jetkizýshileri sanatyna kiredi. Onyń ishinde 47 uıym - jekemenshik. Qordyń barlyq jetkizýshiler tizimin fms.kz saıtynda «Klınıkany tańdaý» bóliminen alýǵa bolady.
Eske sala keteıik, «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy 2016 jyly qurylǵan. Patsıentterdiń múddesine saı tıimdi ári sapaly medıtsınalyq kómekti satyp alýmen aınalysatyn qarjylyq ornyqty uıym. Maqsaty - halyqty tıimdiligi dáleldengen, qoljetimdi medıtsınalyq kómekpen teńdeı qamtamasyz etý, jurtshylyqty medıtsınalyq kómekke negizsiz jumsalatyn artyq shyǵyndardan qorǵaý jáne medıtsınalyq qyzmetterdi kepildik pen teńgerimdi saqtaı otyryp satyp alý.
Qor azamattardy jappaı sapaly medıtsınalyq kómekpen qamtamasyz etip, kórsetiletin medıtsınalyq qyzmettiń sapasyn tıisti deńgeıde ustap turýdy kózdeıdi. Sondaı-aq, ózin-ózi medıtsınalyq qyzmetterdi strategııalyq satyp alýshy uıym retinde damytýǵa baǵyttalǵan.
