Medıtsınalyq saqtandyrý qory tólem tártibin túsindirdi

ALMATY. QazAqparat - Áleýmettik medıtsınalyq saqtandyrý qory Almaty fılıalynyń ókilderi klınıkalarǵa medıtsınalyq qyzmetter úshin aqy tóleý protsesi qalaı júrgiziletinin aıtty, dep habarlaıdy QazAqparat tilshisi.

Eske sala keteıik, atalmysh qor - ústimizdegi jyldyń basynan tegin medıtsınalyq kómektiń kepildengen kóleminiń qarjylyq operatory.

«Eń aldymen, Densaýlyq saqtaý mınıstrligi bekitken tólem erejeleri bar ekenin aıtý qajet. Soǵan sáıkes, tólemderdi alý úshin medıtsınalyq uıymdar qol qoıylǵan, mór basylǵan, qosymshalary bar esep-tizilimdi, kelisilgen mindettemelerdi oryndaý hattamasyn, jetkizýshi men qor fılıaly tarapynan qol qoıylǵan kórsetilgen qyzmetter aktisin usynýy tıis», - deıdi fılıal dırektory Tileýhan Ábildaev.

Tólemaqy somasy medıtsına qyzmetteri sapasy men kólemin monıtorıngteý nátıjesine baılanysty. Máselen, Almatyda alǵashqy jarty jyldyq qorytyndysy boıynsha, somasy 312 mln teńgeden asatyn kemshilikter anyqtaldy. Ol soma ustap qalynady da, keıin basqa medıtsına uıymdarynyń arasynda ornalastyrylady.

Tólem bekitilgen tarıfter boıynsha júrgiziledi. Qazirgi kezde Densaýlyq saqtaý mınıstrligi jáne qor tarıftik saıasatty jetildirý boıynsha belsendi jumys júrgizip jatyr. Atap aıtqanda, 2018 jyly medıtsınalyq qyzmetterdiń keı túrleriniń tarıfi kóterildi. Sonyń ishinde alǵashqy medıtsınalyq-sanıtarlyq, jedel medıtsınalyq járdem qyzmetteri de bar.