Medıtsınalyq saqtandyrý qory tegin qyzmet kórsetken uıymdarǵa 325,2 mlrd teńge bóldi
ASTANA. QazAqparat - «Áleýmettik medıtsınalyq saqtandyrý qory» Kommertsııalyq emes aktsıonerlik qoǵamy jyl basynan beri Qazaqstandaǵy medıtsına uıymdaryna 325,2 mlrd teńge kóleminde qarjy bóldi, dep habarlaıdy QazAqparat.
Qordyń basqarma tóraǵasynyń orynbasary Botagóz Jaqselekovanyń aıtýynsha, 6 maýsymǵa deıin Qormen kelisimshart bekitken medıtsına mekemelerine 325,2 mlrd teńge berilgen.
«Bul kepildendirilgen tegin medıtsınalyq kómek sheńberinde halyqqa medıtsınalyq kómek kórsetý boıynsha bekitilgen kelisimshart aıasynda júzege asty. Qarajat sharttyń jalpy somasynyń 47 paıyzyna teń», - dedi Botagóz Jaqselekova.
Aıta keterligi, Medıtsınalyq saqtandyrý qory tegin medıtsınalyq kómek jáne Mindetti áleýmettik medıtsınalyq saqtandyrý paketteriniń qarjylyq operatory bolyp tabylady. Bıyl Qor men emdeý mekemeleri arasynda halyqqa tegin medıtsınalyq kómek kórsetý boıynsha jalpy somasy 698,9 mlrd teńge bolatyn kelisimsharttar bekitilgen.
«Jumys kestege saı, medıtsınalyq qyzmet sapasyn baqylaýdyń jańa talaptaryna sáıkes júrgizilip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti», - dedi B.Jaqselekova.
Esterińizge sala ketsek, búgingi tańda Qor memlekettik tapsyrys boıynsha 1359 medıtsına uıymymen kelisimshart bekitken. Onyń 599-y - jekemenshik klınıkalar. 2017 jylmen salystyrǵanda jetkizýshi kompanııalar sany edáýir kóbeıgen. Al, olarmen bekitilgen kelisimshart somasy ótken jylmen salystyrǵanda 2 ese artyp, 93 mlrd teńgeni qurady.
