Medıtsınalyq saqtandyrý qory medıtsına uıymdaryna 142,1 mlrd teńge bóldi
ASTANA. QazAqparat - «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy 2019 jyldyń alǵashqy aıynda halyqqa tegin qyzmet kórsetken medıtsına uıymdaryna 142,1 mlrd teńge tóledi. Qarjy kepildendirilgen tegin medıtsınalyq kómek paketi sheńberinde bólingen.
Qordyń baspasóz qyzmetinen habarlaǵanyndaı, tólengen qarajat jalpy kepildendirilgen tegin medıtsınalyq kómek paketi sheńberinde bekitilgen kelisimshart somasynyń 16,8 paıyzyn quraıdy.
«Jumys kestege saı júrip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti. Eger suranys kúsheıgen jaǵdaıda Qor qosymsha qarajat bóledi. Qordyń múmkindigi shekteýli bolǵandyqtan qarjyny ózge qarajat kózderinen alyp, qaıta bóliske salý tıimdirik bolyp otyr», - dedi MSQ basqarma tóraǵasynyń mindetin atqarýshy Botagóz Jaqselekova.
Qarjyny qaıta bóliske salý úshin medıtsına uıymdarynyń ókilderi Qorǵa ótinim joldaıdy. Ótinish zańda belgilengen tártip boıynsha qaralady.
Medıtsınalyq saqtandyrý qory emdeý mekemelerimen tegin medıtsınalyq kómek paketi sheńberinde halyqqa tegin kómek kórsetý jóninde kelisimsharttar bekitken bolatyn. 2019 jyly bekitilgen kelisimsharttardyń jalpy somasy 846 mlrd teńgeni qurady. Bul ótken jylmen salystyrǵanda 5 paıyz kóp.
Bıylǵy jyly memlekettik tapsyrysty 1412 medıtsına uıymy oryndamaq. Onyń 698-i - jekemenshik.
Taǵy bir aıta keterligi, bıyl jeke klınıkalar sany 2018 jylmen salystyrǵanda 59-ǵa kóbeıgen.
Memlekettik tapsyrysty oryndaýǵa qulshynys bildirgen jekemenshik medıtsına uıymdarynyń sany jaǵynan Shymkent, Astana, Almaty qalalary, Qyzylorda, Jambyl jáne Qaraǵandy oblystary kósh bastap tur.
Esterińizge sala ketsek, MSQ 2018 jyldan bastap tegin medıtsınalyq kóme jáne mindetti áleýmettik medıtsınalyq saqtandyrý paketteriniń qarjylyq operatory bolyp tabylady. Qor halyqqa kórsetiletin medıtsınalyq qyzmetterdi QR Úkimeti bekitken tártip boıynsha satyp alýmen aınalysady.
