Medıtsınalyq saqtandyrý qory emdeý mekemelerine 549,8 mlrd teńge tóledi
ASTANA. QazAqparat - «Áleýmettik medıtsınalyq saqtandyrý qory» 2018 jyldyń basynan beri memlekettik tapsyrys boıynsha halyqqa tegin qyzmet kórsetken medıtsına uıymdaryna 549,8 mlrd teńge tóledi. Bul týraly «Áleýmettik medıtsınalyq saqtandyrý qory» KEAQ basqarýshy dırektorynyń mindetin atqarýshy Botagóz Jaqselekova habarlady.
Onyń aıtýynsha, Qormen kelisimshart bekitken jetkizýshi kompanııalarǵa 8 qazanǵa deıin 549,8 mlrd teńge tólengen. «Bul jalpy kepildendirilgen tegin medıtsınalyq kómek paketi sheńberinde bekitilgen kelisimshart somasynyń 70 paıyzyn quraıdy», - dedi B.Jaqselekova.
Tegin medıtsınalyq kómek jáne mindetti áleýmettik medıtsınalyq saqtandyrý paketteriniń qarjylyq operatory bolyp sanalatyn Qor emdeý mekemelerimen halyqqa tegin kómek kórsetý jóninde kelisimsharttar bekitken bolatyn. Bekitilgen kelisimsharttardyń jalpy somasy 785,8 mlrd teńge.
«Jumys kestege saı júrip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti», - dedi B.Jaqselekova.
Esterińizge sala ketsek, Qor búginde memlekettik tapsyrys boıynsha 1379 medıtsına uıymymen kelisimshart bekitken. Onyń 627-si - jekemenshik. Bıyl jeke klınıkalar sany 2017 jylmen salystyrǵanda 166-ǵa kóbeıgen. Al, olarmen bekitilgen kelisimshart somasy 2 ese artyp, 120,2 mlrd teńgeni qurady.
