Medıtsınalyq saqtandyrý engizilgennen keıin de qant dıabetin emdeý tegin bolyp qalady
ASTANA. QazAqparat - Halyqaralyq dıabet federatsııasynyń málimetine sáıkes, álem boıynsha úlken adamdardyń 7 paıyzy ekinshi tıpke jatatyn dıabetpen aýyrady, dep xabarlaıdy QazAqparat tilshisi.
«Atalǵan problema bizde de óte ózekti bolyp tur. Qazaqstanda sońǵy on jyldyń ishinde dıabet aýrýyna shaldyqqan adamdardyń sany eki esege ósti. Olardyń basym bóligi ekinshi tıptegi dıabetpen aýyrady», - dedi QR Densaýlyq saqtaý vıtse-mınıstri Lázzat Aqtaeva búgin qant dıabeti máselelerine arnalǵan xalyqaralyq konferentsııada.
Onyń aıtýynsha, Qazaqstanda qant dıabetiniń aldyn alýyna arnalǵan biraz sharalar qolǵa alynyp keledi. Máselen, 2011 jyly arnaıy ulttyq baǵdarlama qabyldandy. Sonyń aıasynda jyl saıyn bir jarym mıllıon adam skrınıngten ótip turady. Al medıtsınalyq kómektiń kepildendirilgen kólemi aıasynda ınsýlın, glıýkomerler jáne taǵy basqa ónimder tegin taratylady.
«Búginde elimizde mindetti áleýmettik medıtsınalyq saqtandyrý júıesi engizilip jatyr. Oǵan sáıkes, qant dıabeti de áleýmettik mańyzy bar aýrýlarǵa jatady. Bul degenimiz, tegin medıtsınalyq kómektiń kólemi qala beredi», - dep atap kórsetti vıtse-mınıstr.
