Medıtsınalyq poıyzdar 2012 jyly 8 myńnan astam qazaqstandyqqa qyzmet kórsetken - QTJ

ASTANA. 20 aqpan. QazAqparat - «Salamatty Qazaqstan», «Densaýlyq» jáne «Járdem» medıtsınalyq poıyzdary jańa baǵyttar boıynsha qaıta jolǵa shyqty, dep habarlaıdy «Qazaqstan temir joly» UK» AQ-nyń baspasóz qyzmeti.

Medıtsınalyq poıyzdar 2012 jyldyń basynan bastap 8 000-nan astam qazaqstandyqqa qyzmet kórsetken.

«Salamatty Qazaqstan» poıyzy 2012 jyldyń 19 aqpanynda Qaraǵandy stansasynan jergilikti ýaqyt boıynsha saǵat 20:15-te jolǵa attandy. Poıyz brıgadasy 10 naýryzǵa deıin Kókshetaý mańyndaǵy Smırnovo, Qııaly, Taıynsha, Makınka, Eltaı stansalaryn aralap, barlyǵy 1 376 shaqyrym joldy júrip ótedi. Qalǵan eki medıtsınalyq «Densaýlyq» pen «Járdem» poıyzdary Almaty-2 men Aqtóbe stansalarynan búgin jolǵa attanbaq.

Aldynda 2 599 adamǵa qyzmet kórsetken «Densaýlyq» poıyzy ústimizdegi jyldyń 20 aqpanynan 6 naýryzyna deıin Almaty oblysynyń 548 shaqyrymǵa sozylatyn 11 stansasyn, onyń ishinde Jetigen, Otar, Shılibastaý, Shamalǵan jáne taǵy basqa stansalardy basyp ótedi.

Arnaıy emdik-dıagnostıkalyq medıtsınalyq «Járdem» poıyzy 2000 shaqyrymdyq jol júrip, Aqtóbe oblysynyń 30 stansasyn aralaıdy. Áıteke bı, Nıkeltaý, Іzimbet, Birshoǵyr, Kópmola, Shubarqudyq syndy stansalardyń turǵyndary joǵary bilikti mamandardyń nazarynan tys qalmaıdy. Birinshi marshrýt kezinde «Járdem» poıyzy Batys Qazaqstan oblysynyń 8 stansa men razezderine at basyn tiregen. Medıtsınalyq kómekke 1 854 adam júgingen bolatyn.

Barlyq úsh medıtsınalyq poıyz aldynda barǵan stansalarǵa toqtamaı, jańa eldimeken turǵyndaryna kómek beretinin atap ótken jón.