Medıtsınalyq mobıldi brıgadalar 7,6 ese arttyryldy - Alekseı Tsoı
«Koronavırýs ınfektsııasy pandemııasynyń saldarynan oryn alǵan jaǵdaıdy eskere otyryp, sizderdiń nazarlaryńyzdy mınıstrliktiń halyqqa medıtsınalyq kómek kórsetý júıesin nyǵaıtý boıynsha qabyldaǵan sharalaryna aýdartqym keledi. Halyqqa alǵashqy medıtsınalyq-sanıtarlyq kómekti sapaly ári der ýaqytynda kórsetýdi jaqsartý aıasynda mobıldi brıgadalardyń sany 478-den 3 640-qa nemese 7,6 esege ulǵaıtyldy. Brıgadalar úıde medıtsınalyq kómek kórsetý úshin qajetti klınıkalyq-dıagnostıkalyq mınımýmmen jabdyqtalǵan. Osy jyldyń shildesinen mobıldi brıgadalar 280 myńnan astam qyzmet kórsetti», - dedi mınıstr IX Azamattyq forým aıasynda úkimettik emes uıymdar ókilderimen kezdesýi barysynda.
Onyń aıtýynsha, koronavırýsqa shaldyqqandardy, sonymen qatar dıspanserlik eseptegi jáne 65 jastan asqan naýqastardy, júkti áıelderdi qashyqtan qarqyndy qadaǵalaý uıymdastyryldy. Koronavırýs juqtyrǵan naýqastarǵa konsýltatsııalyq kómek kórsetý úshin quramynda joǵary oqý oryndarynyń, ǵylymı ortalyqtar men ǵylymı-zertteý ınstıtýttarynyń professor-oqytýshy quramynan jasaqtalǵan óńirlik jáne respýblıkalyq sarapshylar toby jasaqtaldy.
«Jedel kómek avtokólikteriniń parki jańartyldy. 703 tehnıka qazirgi ýaqytta jetkizilse, 464 sanıtarlyq mashına jetkizý satysynda tur. Jedel kómek jetýiniń ortasha ýaqyty 25 mınýttan 14 mınýtqa deıin qysqardy. Buǵan qosa, Memleket basshysy aýyldarǵa medıtsınalyq qyzmet kórsetýdi jaqsartý boıynsha sharalar ázirleýdi tapsyrǵan bolatyn. Osyǵan oraı, aýyl turǵyndaryna ambýlatorlyq kómekti qoljetimdi jasaý úshin 100 jyljymaly medıtsınalyq keshen satyp alynyp, óńirlerge jetkizilip jatyr», - dedi Alekseı Tsoı.
Sonymen qatar aýyldarda alǵashqy medıtsınalyq-sanıtarlyq kómek kórsetetin 300 jańa nysan ashý jáne 137 ambýlatorlyq-emhana ǵımaratyn salý josparlanǵan.