Medıtsınalyq mekemeler tolyq elektrondyq qujat almasýǵa kóshedi - Aqmola oblysy

KÓKShETAÝ. QazAqparat - Aqmola oblysyndaǵy medıtsınalyq mekemeler keler jyldyń basynan bastap tolyq elektrondyq qujat almasý formatyna kóshedi. Bul týraly óńirlik kommýnıkatsııalar qyzmetinde ótken brıfıngte Aqmola oblystyq densaýlyq saqtaý basqarmasynyń basshysy Sáýle Qısyqova málim etti, dep habarlaıdy QazAqparat tilshisi.

Onyń aıtýynsha, «Keshendi medıtsınalyq aqparat júıesi» elektrondyq qujat almasý baǵdarlamasy  oblystaǵy 35 medıtsınalyq uıymda qoldanysqa engizilip otyr.

«Bıylǵy qańtar aıynan bastap, elimizdiń Qaraǵandy, Qostanaı, Batys Qazaqstan jáne Aqmola oblystarynda qaǵazsyz densaýlyq saqtaý júıesi pılottyq jobasy júzege asyrylýda. Aqmola oblysynda 48 medıtsınalyq mekeme bar, onyń 46 densaýlyq saqtaý basqarmasynyń qaramaǵynda», - dedi Sáýle Qısyqova.

Sonymen qatar, basqarma basshysy qaǵazsyz qujat almasýdy júzege asyrý úshin «Keshendi medıtsınalyq aqparat júıesi» baǵdarlamasyn ıgerý qajet bolǵanyn atap ótti.

«Bul baǵdarlama 35 eldi mekende júzege asyrylýda. 1 qańtardan bastap keshendi medıtsınalyq aqparat júıesi arqyly 140 434 adam dárigerdiń qabyldaýyna jazyldy. Onyń ishinde 66 208 adam regıstratýra arqyly, 68 868-y dárigerdiń jeke kabıneti arqyly,  1-eýi termınal, 5 315-i naýqastyń jeke kabıneti arqyly.  Oǵan qosa, búgingi kúnge deıin 202 398 elektrondy tólqujat toltyrylyp otyr. Sonymen qatar, Damukmis mobıldik qosymsha jáne cit-damu.kz saıty arqyly naýqastyń jeke kabınetine kirýge bolady. Qazirdiń ózinde 1 809 qoldanýshy jeke kabınetinde tirkelgen. Osy kúni oblystaǵy 27 medıtsınalyq mekeme qaǵaz qujat almasýdyń bir bóligin elektrondy formatqa kóshirip otyrsa, keler jyldyń basynda barlyq medıtsınalyq mekeme tolyq aýysatyn bolady», dedi Sáýle Qısyqova.