Medıtsınalyq maskany shyǵarý baqylaýǵa alynǵan - Eraly Toǵjanov

NUR-SULTAN. QazAqparat – Qazaqstan Úkimeti halyqty medıtsınalyq maskamen qamtamasyz etý máselesine qatysty kóptiń kókeıinde júrgen suraqtarǵa jaýap berdi, dep habarlaıdy QazAqparat tilshisi.

«Álbette, búgingi kúni keı jerde maska shynynda da jetispeýi múmkin. Bul másele alǵash kóterilgen kezde dúrbeleńniń týǵany belgili. Qazaqstanda ǵana emes, birqatar elde mundaı jaǵdaı tirkeldi. Sol sebepti belgili bir jetispeýshiliktiń bolǵany ras. Biraq qazir atalmysh másele tolyǵymen memlekettiń baqylaýyna alyndy. Qazir halyqty maskamen qamtamasyz etý máselesi kún tártibinde turǵan joq. Memleket koronavırýsqa alańdap otyr. Al maska óz elimizde shyǵarylyp jatqanyn atap ótý kerek. Qazaqstandy maskamen tolyq qamtamasyz etý máselesi sheshiledi», - dedi Premer-Mınıstrdiń orynbasary Eraly Toǵjanov Úkimettiń baspasóz ortalyǵynda ótken brıfıng barysynda.

Sonymen qatar, Úkimet basshysynyń orynbasary maskany shet elderge satý máselesi tolyǵymen baqylaýǵa alynǵanyna da sendirdi.

«Búkil keden organyna Qazaqstan aýmaǵynan tys maskalardy shyǵarýǵa tyıym salý boıynsha naqty ári qatań tapsyrma berildi. Qazaqstannan Qytaıǵa maska shyǵarý jaǵdaıy boldy», - dedi ol.

Óz kezeginde Densaýlyq saqtaý mınıstri Eljan Birtanov adam saý bolsa maska taǵýdyń eshqandaı qajeti joq ekenin aıtady.

«Eń birinshi kezekte biz syrqattanǵan adamdar men aýrýhanalarǵa kúni boıy túrli ınfektsııalar boıynsha jumys júrgizetin adamdardy qamtamasyz etýimiz kerek. Sondyqtan medıtsınalyq uıymdardyń rezervterin qurdyq. Eger siz syrqattanyp qalsańyz, týǵan-týystaryńyz ben jaqyndaryńyzdyń qaýipsizdigi úshin maska taǵyp júrýińiz kerek», - dedi ol.

Eske sala ketsek Úkimette ótken baspasóz máslıhatynda QR Indýstrııa jáne ınfraqurylymdyq damý vıtse-mınıstri Berik Qamalıev qazaqstandyq kásiporyndar kúnine 170 myń medıtsınalyq maska shyǵaratynyn aıtqan edi.