Medıtsınalyq maskany kóshede de taǵý kerek - mınıstrlik

NUR-SULTAN. QazAqparat – 4 mamyrdan bastap kóshege shyǵyp, sportpen shuǵyldanýǵa bolady. Bul týraly onlaın baspasóz máslıhatynda Qazaqstannyń bas memlekettik sanıtarlyq dárigeri Aıjan Esmaǵambetova málim etti, dep habarlaıdy QazAqparat tilshisi.

«Birtindep turǵyndarǵa úıden shyǵýǵa, serýendeýge ári sportpen aınalysýǵa ruqsat berýdemiz. Alaıda toptasyp jınalǵan durys emes. Búginnen bastap sportpen shuǵyldanýǵa ruqsat etilgen», - dedi A. Esmaǵambetova.

Sonymen qatar ol medıtsınalyq maskany taǵýǵa qatysty túsinik berdi.

«Biz maskany ǵımarattarda jáne kóshede taǵýǵa keńes beremiz. Nege dalada maska taǵý kerek? Bul turǵyda halyqaralyq tájirıbeni zerttep, ózimizdegi qadamdardy eskerdik. Búginde Dúnıejúzilik densaýlyq saqtaý uıymy aǵzanyń shyryshty qabatyna qoldy tıgizbeý úshin maskany kóshede de taqqan durys ekenin alǵa tartyp otyr. Bul óz kezeginde indet juqtyrý joly. Zertteýlerge súıensek, adam 3 mınýt ishinde eriksiz túrde, ıaǵnı baıqamastan betin, murnyn, kózin bes retke deıin ustaýy múmkin», - dedi Qazaqstannyń bas memlekettik sanıtarlyq dárigeri.

Budan buryn habarlanǵandaı, 4 mamyrdan bastap dalada sportpen shuǵyldanyp, jattyǵý jasaýǵa ruqsat etildi.