Medıtsınalyq maska 30 teńgeden qymbattaǵan joq - qaýymdastyq
NUR-SULTAN. QazAqparat - Elordada medıtsınalyq maska baǵasynyń qymbattap ketpeý sharalary júrgizilýde. Bul týraly koronavırýstyq ınfektsııanyń ákelinýi men taralýynyń aldyn alý maqsatynda ótken brıfıngte aıtyldy.
«Búgingi tańda Nur-Sultan qalasyndaǵy bólshek saýdada medıtsınalyq maskanyń jetispeýshiligi baıqalady. Keshe Nur-Sultan qalasy ákimdigi janynan qurylyp, dıstrıbıýtor, jetkizýshi, dárihana jelilerimen birigip shtab quryldy. Aldymen bul belgili bir deńgeıde qoldan jasalǵan dúrligý deýge bolatynyn aıtyp ótý kerek. Bizdiń eldegi medıtsınalyq maska shyǵarýshylar shıkizat bolmaýy sebepti tyǵyryqqa tireldi. Úkimet jaqyn ornalasqan memleketterden shıkizat jetkizý máselesin sheship jatyr. Jaqyn arada dúrligý basylady dep oılaımyz», - deıdi «QR farmetsevtıkalyq qyzmettin qoldaý jáne damytý qaýymdastyǵy» ZTB Nur-Sultan qalasy fılıalynyń dırektory Gúlsaraı Almýrzına.
Onyń aıtýynsha, qaýymdastyq qalalyq ákimdik, QR DSM Taýarlar men kórsetiletin qyzmetterdiń sapasy men qaýipsizdigin baqylaý komıteti birlesip medıtsınalyq maska baǵasynyń qymbattap ketpeýin qadaǵalaý sharalaryn júrgizgen.
«Qarapaıym medıtsınalyq maskanyń baǵasy 30 teńgeden kóterilgen joq. Tutynýshyǵa 10-20-dan artyq satylmaǵan. Qaýymdastyqqa kirmegen dárihana jelileri de bar, olar osy jaǵdaıdy paıdalanyp baǵasyn kótergen bolýy múmkin. Negizinde medıtsınalyq maskany adam kóp jınalǵan qoǵamdyq orynda jáne aýyrǵan kezde taǵý kerek. Dárihanalarda balalarǵa jáne eresekterge arnalǵan antıbakterıaldy, antıseptıkalyq suıyqtyqtar bar. Onymen qol jýýǵa bolady», - deıdi ol.
