Medıtsınalyq qyzmetti satyp alýdyń jańa erejesi ázirlendi

ASTANA. QazAqparat - Densaýlyq saqtaý mınıstrligi MÁMS jaǵdaıynda medıtsınalyq qyzmetti satyp alýdyń jańa erejesin ázirledi. Bul týraly búgin atalǵan vedomstvonyń basshysy Eljan Birtanov Almatyda memlekettik jáne jeke menshik medıtsına uıymdary ókilderiniń qatysýymen ótken kezdesýde málim etti, dep habarlaıdy QazAqparat.

«Kepildendirilgen tegin medıtsınalyq kómek pen mindetti áleýmettik medıtsınalyq saqtandyrý júıesi sheńberinde densaýlyq sýbektilerinen qyzmet túrlerin satyp alý erejesi ázirlendi. Qazirgi tańda tıisti buıryq jobasy talqylanyp, kelisilip jatyr»  - dep habarlady E.Birtanov.

Mınıstrlik baspasóz qyzmetiniń málimetinshe, jańa erejeler bıznes sýbektileriniń kepildendirilgen tegin medıtsınalyq kómek kólemi (KTMKK) men mindetti áleýmettik medıtsınalyq saqtandyrý (MÁMS) aıasynda qyzmet kórsetý tártibin jeńildetedi.

Belgili bolǵandaı, densaýlyq saqtaý nysandarynan talap etiletin qujattar 22 paıyzǵa, al, bastapqy medıtsınalyq qujattama formalary 30 paıyzǵa qysqartyldy.

Medıtsınalyq saqtandyrýdy engizýdiń basty maqsattarynyń biri - ol  árbir muqtaj adamǵa otbasylyq bıýdjetine zalal keltirmeı, onyń kiris  qarajatyna qaramastan qajetti medıtsınalyq kómekpen qamtamasyz etý bolyp tabylady.

Vedomstvo basshysy medıtsınalyq qyzmet sapasy týraly aıta kele,  naýqasta medıtsınalyq saqtandyrý jaǵdaıynda klınıkany jáne kásibı dárigerdi tańdaý múmkindigi bolatynyna nazar aýdardy.

Densaýlyq saqtaý mınıstrligi qazir medıtsınalyq bızneske kedergilerdi joıý jáne naryqta básekelestikke yntalandyrý boıynsha úlken jumys júrgizýde. Negizsiz 28 sanıtarlyq erejeler joıyldy, 24 qujatqa ózgerister engizilip, bıznes úshin jaǵdaıdy jaqsartatyn 300-den astam normatıvtik aktiler qarastyrylýda.  Memlekettiń 14 rettýshi fýnktsııasyn naryqqa berý qarastyrylýda. Atap aıtqanda, dárigerlerge dáreje berý, olardyń bilimin baǵalaý kásibı qaýymdastyqtardyń quzyrynda bolmaq. 

Esterińizge sala keteıik, Qazaqstanda 2017 jyldyń 1 shildesinen bastap Mindetti áleýmettik medıtsınalyq saqtandyrý týraly zań kúshine enedi. Zań talaptary boıynsha eń aldymen saqtandyrý jarnasyn jumys berýshiler men jeke kásipkerler tóleıdi.