Medıtsınalyq qyzmet sapaly jáne qoljetimdi bolýy kerek - Eljan Birtanov
ORAL. QazAqparat - Medıtsınalyq qyzmet sapaly jáne qoljetimdi bolýy kerek. Bul týraly BQO-ǵa jumys saparymen kelgen QR Densaýlyq saqtaý mınıstri Eljan Birtanov málim etti, dep habarlaıdy QazAqparat tilshisi.
Mınıstr aldymen №3 qalalyq emhanada bolyp, osynda «Emdelýshi kabıneti» mobıldi qosymshasymen, medıtsınalyq aqparat júıesimen, elektrondy kezek barysymen tanysty. Sondaı-aq oblystyq klınıkalyq aýrýhanada «KazmedInform» medıtsınalyq aqparattyq júıesi men emdelýshiniń tirkelýden bastap jazylyp shyǵýyna deıingi qaǵazsyz «joly» kórsetildi.
Eljan Birtanovtyń aıtýynsha, Elbasy tapsyrmasyna sáıkes medıtsınalyq qyzmettiń sapaly da tez kórsetilýine barynsha mán berilýde. Sondaı-aq ol kez kelgen turǵynǵa qoljetimdi bolýy tıis.
«Qazirgi tańda qaǵazsyz qujat aınalymyna kóshýdiń mańyzy zor. Osyǵan oraı Batys Qazaqstan oblysynda pılottyq joba qolǵa alynyp, sonyń júzege asyrylý barysymen tanystyq. Barlyq derek kompıýterde turatyndyqtan, dárigerler qaǵazbastylyqtan arylyp, naýqastarmen tikeleı jumys jasaýǵa múmkindik alady», dedi mınıstr.
Onyń sózine qaraǵanda, ekinshiden, jedel medıtsınalyq qyzmet halyqaralyq talaptarǵa saı bolýy kerek. Elimizde jedel járdemge júginetinder kóp. Ókinishke qaraı, keıbir kórsetkishter basqa memleketterge qaraǵanda, tómendeý. Sondyqtan elimizdegi barlyq oblystyq aýrýhanalardyń qabyldaý bólimsheleri jańǵyrtylyp, mamandar oqytylyp, trıaj júıesine kóshedi. ıAǵnı munda kelgen naýqastar úsh sanatqa bólinedi. Sonyń ishinde eń aýyr jaǵdaıdaǵy adamdarǵa aıryqsha kóńil bólinip, soǵan sáıkes qyzmet kórsetiledi.
E.Birtanov sondaı-aq jumys sapary barysynda Zelenov aýdanynda bolyp, sodan keıin Oral qalasynda densaýlyq saqtaý salasy qyzmetkerlerimen kezdesedi.
Aıta keteıik, Qazaqstannyń barlyq medıtsına uıymdaryn qaǵazsyz jumys jasaýǵa bıylǵy jyldyń aıaǵyna deıin kóshirý kózdelýde.
