Medıtsınalyq kómektiń sapasy emhanalar qyzmetiniń tıimdiligine, dárigerlerdiń kásibı deńgeıine tikeleı baılanysty- Salıdat Qaıyrbekova
ALMATY. 2 naýryz. QazAqparat - Memleket tarapynan densaýlyq saqtaý júıesin damytýǵa jetkilikti qarjy bólinýde. Densaýlyq saqtaý nysandarynyń qurylysy jáne olardy qymbat quralǵylarmen jabdyqtaý, mamandardyń biliktiligin kóterý baǵytynda sharalar qabyldanýda.
Al medıtsınalyq qyzmetkerler turǵyndarǵa sapaly qyzmet kórsetýge mindetti. Óıtkeni, medıtsınalyq kómektiń sapasy emhanalar qyzmetiniń tıimdiligine, dárigerlerdiń kásibı deńgeıine tikeleı baılanysty. Bul týraly búgin Almatyda ótken Densaýlyq saqtaý basqarmasynyń Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasyn iske asyrý barysy jáne 2012 jylǵa arnalǵan mindetteri jónindegi keńeıtilgen alqa otyrysynda Densaýlyq saqtaý mınıstri Salıdat Qaıyrbekova aıtty.
Alqa otyrysynda Densaýlyq saqtaý mınıstri: «Medıtsınalyq qyzmet sapasy azamattardyń shaǵymdaryna baılanysty baǵalanatyndyǵyn» atap óte kele, «Almatyda aryzdar sany 32% tómendegenimen, medıtsınalyq kómektiń sapasyna qatysty shaǵymdar úlesi 32% qurap otyr. Tıisinshe, bastapqy medıtsınalyq-sanıtarııalyq kómek uıymy deńgeıinde jumysty durys uıymdastyrý kerek»,-dedi. Ol sondaı-aq bul baǵytta QR Densaýlyq saqtaý mınıstrligi 2011 jyly Almatynyń bastapqy medıtsınalyq-sanıtarııalyq kómek uıymdaryn nyǵaıtýǵa maqsatty transfert túrinde 1,2 mlrd. teńge bólingenin aıtty.
Sózin túıindeı kele Salıdat Qaıyrbekova: ««Salamatty Qazaqstan» memlekettik baǵdarlamasy jáne Memleket basshysynyń bıylǵy Joldaýy medıtsınalyq kómektiń sapasy men qoljetimdiligin arttyrýdy qarastyrady. Ol myqty menedjmenti qalyptasqan, qarjylandyrýy turaqty jáne básekege qabiletti densaýlyq saqtaý júıesin qurý mańyzdy. Elimizdegi eń iri megapolıstiń densaýlyq saqtaý salasy ulttyq densaýlyq saqtaý júıesine úlgi bolýy tıis», dep atap aıtty.
