Medıtsınalyq kómektiń barlyq túri qoljetimdi ári sapaly bolýy kerek –Toqaev
NUR-SULTAN. QazAqparat – Eldegi sanıtarlyq-epıdemıologııalyq ahýal jónindegi jumys keńesinde Prezıdent Qasym-Jomart Toqaev ana men bala ólimi týraly pikir bildirdi, dep habarlaıdy QazAqparat tilshisi Aqordanyń Twitter-degi paraqshasyna silteme jasap.
«Men medıtsınalyq kómektiń qol jetimdiligi tómendegenin tekke aıtyp turǵan joqpyn. Bul ana men bala ólim-jitiminiń, qan aınalymy júıesi aýrýlarynan jáne basqa da aýrýlardan bolatyn ólim-jitimniń ósýine áser etýde», - dedi Prezıdent.
Memleket basshysy medıtsınalyq mekemelerdegi tósekterdi COVID-19 ınfetsııasyna beıimdeýdiń áserinen josparly otalardy júrgizýge ketetin qymbat ýaqyt urlanyp jatqanyn aıtty.
«Saldarynan asqynǵan patologııasy bar patsıentterdiń sany artyp, ólim-jitim kóbeıedi. Pandemııa jaǵdaıynda medıtsınalyq kómektiń barlyq baǵyttary boıynsha medıtsınalyq kómektiń sapasy men qoljetimdiligin qamtamasyz etý mańyzdy. Ulttyq vaktsınalaý kúntizbesi aıasynda ekpeni ýaqtyly jasaý óte mańyzdy», - dedi Qasym-Jomart Toqaev.
Eske salsaq, Prezıdent Qasym-Jomart Toqaev elimizdegi sanıtarlyq-epıdemıologııalyq ahýal jóninde jumys keńesin ótkizip jatyr.
