Medıtsınalyq kómekti uıymdastyrýdyń ıntegratsııalanǵan modeli engiziledi – Birtanov

NUR-SULTAN. QazAqparat – Medıtsınalyq kómekti uıymdastyrýdyń ıntegratsııalanǵan modeli engiziledi. Bul týraly Parlament Májilisiniń jalpy otyrysynda halyq densaýlyǵy týraly kodeks jobasyn talqylaý kezinde Densaýlyq saqtaý mınıstri Eljan Birtanov málim etti, dep habarlaıdy QazAqparat tilshisi.

«Kodeks jobasymen medıtsınalyq kómekti uıymdastyrýdyń ıntegratsııalanǵan modeli engizilýde. Azamattarǵa tıimdi, sapaly medıtsınalyq kómek kórsetý jáne syrqattanýshylyq deńgeıin tómendetý maqsatynda Kodeks jobasynda medıtsınalyq kómek kórsetýdiń úsh deńgeıli júıesi qarastyrylǵan. Bul júıe – barlyq deńgeıde patsıentter aǵymyn basqarýǵa jáne statsıonarlarda kez kelgen beıindegi patsıentterdi qabyldaýǵa múmkindik beredi. Sonymen qatar, Kodeks jobasynda medıtsınalyq kómektiń kepildik berilgen kólemi, mindetti medıtsınalyq saqtandyrý jáne erikti medıtsınalyq saqtandyrý aıasyndaǵy medıtsınalyq kómektiń kólemin anyqtaý qaǵıdalary reglamenttelgen», - dedi mınıstr.

Onyń sózine qaraǵanda, medıtsınalyq kómektiń qaýipsizdigin qamtamasyz etý maqsatynda medıtsınalyq kómek kórsetýdi standarttaýdyń biryńǵaı tásilderi jasalady, transplantatsııa ınstıtýty jetildiriledi, memlekettik baqylaý kúsheıtiledi.

Nátıjesinde, medıtsınalyq kómek qalalyq jáne aýyldyq jerlerde qoljetimdi bolady, medıtsınalyq kómek kórsetý protsesteri standarttalady, usynylatyn medıtsınalyq qyzmetterdiń sapasyn baqylaý kúsheıtiledi.

Budan buryn habarlanǵandaı, Parlament Májilisiniń jalpy otyrysynda «Halyq densaýlyǵy jáne densaýlyq saqtaý júıesi týraly» kodeks jobasy birinshi oqylymda maquldandy.