Medıtsınalyq kómek sapasynyń tómendeýine ne sebep - mınıstr pikiri
ASTANA. QazAqparat - Jergilikti atqarýshy organdarǵa 2019 jyldyń aıaǵyna deıin bir dárigerge júktemeni 1700-ge deıin jetkizý qajet. Bul týraly búgin Úkimettiń selektorlyq rejimdegi otyrysynda Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.
«Alǵashqy jáne eń ózekti problemalardyń biri - medıtsınalyq kómektiń sapasy, ásirese alǵashqy medıtsınalyq-sanıtarıalyq kómek deńgeıinde. Sapa deńgeıi tómendeýiniń basty sebepteri: medıtsına qyzmetkerleriniń shamadan tys júktemesi; kezekter, halyqtyń tyǵyzdyǵy; alǵashqy medıtsınalyq kómek deńgeıinde qyzmet kórsetý sapasy»,- dedi mınıstr.
Osy rette ol memlekettik baǵdarlamada alǵashqy medıtsınalyq kómek sapasyn arttyrýǵa baǵyttalǵan sharalarǵa toqtaldy.
«Birinshi - jańa dáriger bólimshelerin qurý jáne alǵashqy medıtsınalyq-sanıtarlyq kómektiń shaǵyn ortalyqtaryn kóbeıtý, onyń ishinde memlekettik-jekeshelik áriptestik arqyly 2019 jyldyń sońyna deıin jalpy praktıka dárigeriniń júktemesin tómendetý. Jergilikti atqarýshy organdarǵa 2019 jyldyń aıaǵyna deıin 1 dárigerge júktemeni 1700-ge deıin jetkizý qajet», - dedi E.Birtanov.
Ekinshiden, onyń aıtýynsha, otbasylyq dárigerlik praktıkany odan ári damytý jáne Memleket basshysynyń Joldaýynda aıtylǵan dıspanserleýdi, ólimniń 70 paıyzdan astamyna ákeletin aýrýlardy basqarý baǵdarlamalaryna ózgertý júrgiziledi. 2020 jylǵa qaraı aýrýlardy basqarý baǵdarlamalarymen 3 syrqat boıynsha esepte turǵan patsıentterdi qamtý 11-den 30 paıyzǵa deıin ulǵaıtylatyn bolady. Jergilikti atqarýshy organdar atalǵan baǵdarlama boıynsha barlyq dárigerler men meıirbıkelerdi 2020 jylǵa deıin oqytýy tıis.
«Úshinshi - qaǵazsyz qujat aınalymyna tolyq kóshý arqyly barlyq emhanalardyń qyzmetin tsıfrlandyrýdy jalǵastyrý, sonyń arqasynda medıtsına personalyna túsetin shamadan tys júktemeni tómendetý kerek»,- dedi mınıstr.
