Medıtsınalyq anyqtama jasaıtyn alaıaqtar qansha paıda tabady
Joba jetekshisi Jazıra Jylqyshıevanyń aıtýynsha, búginde Astana boıynsha 11 emxananyń 086 úlgisindegi medıtsınalyq anyqtany berýge ruqsaty bar. Ótken jyly atalǵan mekemelerde 30 myńǵa jýyq anyqtama berildi. Árbir anyqtamanyń baǵasy - 7 myń teńge.
«Kúni keshe Astana qalasy boıynsha sybaılas jemqorlyqqa qarsy kúres departamenti medıtsınalyq anyqtamalardy qoldan jasap kelgen qylmystyq topty ustady. Olar óz úılerinde jalǵan medıtsınalyq qujattardy jasaǵan. Endi qarańyz, dál osy jaǵdaıda kúnine 10 jalǵan medıtsınalyq anyqtama berilip otyrdy. Sonda bir ǵana qylmystyq top jylyna 3 650 anyqtama jasaı alady. Demek, Astananyń emxanalary bir jyldyń ishinde 25 550 000 teńgeden qaǵylyp otyr. Ol - tek 086 úlgisindegi anyqtamanyń shyǵyny ǵana», - dedi J.Jylqyshıeva Astanada ótken baspasóz máslıxatynda.
Onyń aıtýynsha, atalǵan qarjyǵa emxanalardyń jaǵdaıyn jaqsartýǵa, sondaı-aq, dárigerlerdiń jalaqysyn kóterýge bolatyn edi. "Bul - qarjylaı jaǵy ǵana. Al atalǵan máseleniń mańyzdy bir jaǵyna zer salsaq, jalǵan medıtsınalyq anyqtamany satyp alatyn adamnyń densaýlyǵyn eshkim teksermeıdi. Sizge tamaq ákelgen daıashy, shashyńyzdy alyp jatqan shashtaraz, avtobýsta dál janyńyzda otyrǵan mıgrant sol medıtsınalyq anyqtamany satyp alýy ábden múmkin. Biraq ózge adamdarǵa qaýipti syrqatpen aýyryp júrgenin bilmeıdi», - dep atap kórsetti J.Jylqyshıeva.
Aıta keteıik, búgin Sybaılas jemqorlyqqa qarsy kúres departamenti Astanada medıtsınalyq qujattardy qoldan jasaǵan qylmystyq top quryqtalǵanyn jarııalady. Baspasóz máslıxatynda atalǵan toptyń vıdeosy da kórsetildi.