Medıtsınalyq aqparattyq júıede Damýmedti monopolıst deýge bolady - Májilis depýtaty
NUR-SULTAN. QazAqparat – Májilis depýtaty, Áleýmettik-mádenı damý komıtetiniń múshesi Gúldara Nurymova densaýlyq saqtaýdy tsıfrlandyrý jumystary dárigerler eńbegin jeńildetpedi, kerisinshe kúrdelene tústi dep synǵa aldy, dep habarlaıdy QazAqparat.
«Ekinshi jyl qatarynan densaýlyq saqtaý salasy pandemııa jaǵdaıynda aýqymdy júktememen jumys istep jatyr jáne ekinshi jaǵynan, densaýlyq saqtaýdaǵy tsıfrlandyrýdy qalyptastyrýdyń kúrdeli kezeńin bastan keshýde. Densaýlyq saqtaýdy tsıfrlandyrý dárigerlerdiń eńbegin jeńildetken joq. Kerisinshe, dáriger men medbıkeniń jumysy kúrdelene tústi. Biz «Nur Otan» fraktsııasynyń depýtattar toby bıylǵy 2 maýsymda patsıent qabyldaýda praktıkalyq dárigerdiń qalaı jumys isteıtinine, óz jumysynda naqty qandaı problemalar bolatynyna kóz jetkizý úshin Nur-Sultan qalasynyń №5 qalalyq emhanasyna bardyq. Kezdesý Densaýlyq saqtaý mınıstrligi, Respýblıkalyq elektrondyq densaýlyq saqtaý ortalyǵy, Damýmed, salalyq kásipodaq ókilderiniń qatysýymen uıymdastyryldy. Naýqasty qabyldaýdyń jalpy tájirıbelik dárigerdiń barlyq máselelerin kezeń-kezeńimen taldadyq», - dedi depýtat QR Parlamenti Májilisiniń Áleýmettik-mádenı damý komıtetinde ótken dóńgelek ústelde.
Onyń aıtýynsha, №626 buıryqqa sáıkes barlyq aýrýlar Tegin medıtsınalyq kómektiń kepildik berilgen kólemi (aýrýlardyń 25 toby jáne áleýmettik mańyzy bar aýrýlar: týberkýlez, onkologııa, psıhıkalyq jáne juqpaly aýrýlar, qant dıabeti) jáne Memlekettik-áleýmettik medıtsınalyq saqtandyrý bolyp bólinedi.
«Qarjylandyrý kózine (TMKKK nemese MÁMS) sáıkes qajetti aýrý kodyn, qajetti qyzmetterdi tabý jáne joldamaǵa durys engizý úshin dárigerge qansha ýaqyt qajet ekenin elestetip kórińiz. Mindetti medıtsınalyq densaýlyq saqtaý qorynyń árbir medıtsınalyq uıymyna ázirlenip, túsiriletin eki derekkóz (TMKKK jáne MÁMS) boıynsha aı saıynǵy qarjylandyrý jospary bolǵandyqtan, dáriger asyra oryndamaý úshin qolda bar jospardy oryndaýǵa májbúr. Qarjylandyrýdyń osyndaı kúrdeli bólinýimen shatasýlar bolady, qate jiberiledi», - deıdi G. Nurymova.
Onyń aıtýynsha, Qazaqstan boıynsha medıtsınalyq aqparattyq júıeniń negizgi jetkizýshisi Damýmedti monopolıst dep ataýǵa bolady, onyń jumysynda kóptegen máseleler bar.
«Damý dári-dármekpen qamtamasyz etýdiń ıntegratsııalanǵan júıesi portalymen jáne fertıldi jastaǵy áıelder portalymen jáne júkti áıelder tirkelimimen ıntegratsııalanbaıdy. Dáriger derekterdi Damýmedke engizedi jáne barlyq tekserý derekteri men nátıjelerin fertıldi jastaǵy áıelder, dárilik qamtý aqparattyq júıesi portalyna qaıta engizýge májbúr bolady. Medıtsınalyq aqparattyq júıe ázirleýshileri óńirlerdegi jalǵyz jetkizýshiler retinde is júzinde bastapqy medıtsınalyq sanıtarlyq kómekke platformada qalaı jumys isteýdi talap etedi, algorıtmderdi aıqyndaıdy. MAJ ázirleýshisi medıtsına qyzmetkerlerimen tikeleı jumys isteıtin menedjerlerdi keńeıtýge múddeli emes. Barlyq statıstıka-esep berý áli kúnge deıin Densaýlyq saqtaýdy damytý ortalyǵynyń eski formalary boıynsha tapsyrylady. Esep berýdiń jańa formalary joq. Barlyq esep qolmen jasalady», - dedi depýtat.
