Medıtsınaǵa bólingen qarjy artyp jatqanymen, JІÓ-degi úlesi sol kúıinde qalyp otyr – sarapshy
ASTANA. QazAqparat – «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy dırektorlar keńesiniń tóraǵasy, QR Prezıdenti janyndaǵy Ulttyq quryltaı múshesi Maqsut Quljanov medıtsına salasyna bólinetin qarajattyń jalpy ishki ónimdegi úlesin kóbeıtýdi usyndy, dep habarlaıdy QazAqparat tilshisi.
«Deni saý ult qalyptastyrý - Qazaqstannyń ǵana emes, jahandyq másele. Sondaı jahandyq máseleniń biri – memleket pen jeke menshiktiń áriptestigi. Ǵylymı ádebıetti qarasaq, ol másele Ulybrıtanııada da, AQSh-ta da pikirtalas taqyrybyna aınalǵanyn kóremiz. Jeke sektor men memlekettiń ózara áreketi qajet. Bul áleýmettik ádilet, medıtsınalyq kómektiń qoljetimdiligi turǵysynan qajet. Qazir biz «jeke menshik medıtsına sapaly», «jeke menshik medıtsına emdelýshi úshin qaýipsiz» degen sózderdi aksıoma sııaqty aıtyp júrmiz. Biraq jekemenshik medıtsına qymbat. Oǵan árkimniń qoly jete bermeıdi. Sondyqtan, bizdiń memlekettik medıtsınalyq uıymdar da jeke menshik uıymdar sııaqty tıimdilik jáne ratsıonaldylyq talaptaryna saı bolýy kerek», - dedi sarapshy densaýlyq saqtaý basshylarynyń ekinshi respýblıkalyq forýmynda.
Onyń paıymynsha, salaǵa bólingen aqshanyń kóbeıgenin aıtyp qana qoımaı, onyń qarapaıym halyq ómirine qandaı ózgeris ákelgenine de mán berý kerek.
«Densaýlyq saqtaý salasyna bólinetin qarajat resýrs árqashan jetpeıdi. Jyl saıyn kóbeıtip jatsa da solaı. Biraq salaǵa bólinetin qarajatty jalpy ishki ónimge shaqsaq, bir orynda turǵanymyzdy kóremiz. Bir kezde salaǵa 200 mlrd teńge bólinse, keıin 900 mlrd teńgeden asty. 5 esedeı ósken. Al qazir 2 trln teńgege jetti. Biraq osy 2 trln teńgeni tómendegi qarapaıym emdelýshiler qalaı sezinip jatyr? Nege kóptegen medıtsınalyq uıymdar kómek kólemin shektep jatady, qoldan jasalǵan shekteýler qoıady. Bul da osy qaýymdastyq aıasynda, búgingi forýmda talqylaýdy qajet etetin mańyzdy másele dep oılaımyn», - dedi Maqsut Quljanov.
