Medıtsınaǵa bólinetin bıýdjet qarajaty jaýapsyz jumsalady - mınıstr

ASTANA. QazAqparat - QR Densaýlyq saqtaý mınıstri Eljan Birtanovtyń aıtýynsha, bir jerde aýrýxanada naýqastarǵa oryn jetpeı jatsa, kelesi jerlerde kerisinshe emxanadaǵy oryndar tym kóp bolyp ketken. Bul densaýlyq salasynyń ınfraqurylymyn durys josparlamaýdyń kórinisi, dep xabarlaıdy QazAqparat tilshisi.

Mınıstrdiń sózine qaraǵanda, búgingi tańda densaýlyq saqtaý salasynyń ınfraqurylymyn damytýdyń biryńǵaı jospary daıyndalyp jatyr. "Qazaqstanda 7914 densaýlyq saqtaý mekemesi bar. Sonyń ishinde 85,5 protsent - memlekettik emxanalar bolsa, 14,5 protsenti jeke menshikke tıesili. Medıtsınalyq uıymdardyń teń jartysy 30 jyl buryn salynǵan. Ótken jyly 11 myńǵa jýyq adam aýrýxanaǵa jatqyzýdy 90 kúnnen astam ýaqyt kútken. Alaıda respýblıka boıynsha 4,2 myń jatyn oryn bos turdy. Osynyń ózi durys jospar qurmaýdyń dáleli", - dedi E. Birtanov Úkimettiń búgingi otyrysynda.

Onyń paıymynsha, qazirgi kezde jergilikti atqarýshy organdary medıtsına salasyn damytýǵa 1 trln teńgeni surap otyr. Degenmen, qurylys nysandaryn josparlaý kezinde olardyń bıýdjet aqshasyn kóptep alýǵa degen qulshynysy da joq emes. Máselen, Astanada balalarǵa arnalǵan ınfektsııalyq emxanada bir jatyn orynǵa 240 sharshy metr qarastyrylǵan. Ondaı kórsetkish xalyqaralyq talaptardan eki ese artyq, al respýblıka boıynsha salynatyn nysandardyń kórsetkishinen alty ese joǵary bolyp tur. Osylaısha, bir jatyn orynǵa bıýdjettiń biraz aqshasy ketip jatady.

«Ambýlatorlyq mekemeni salý kezinde naqty qajettilik, ıaǵnı jergilikti xalyqtyń sany eskerilmeıdi. Osynyń saldarynan jatyn oryndar bos turady. Jergilikti atqarýshy organdar bıýdjet qarajatyn tıimdi jumsaýǵa jaýapsyz qaraıdy. Sondyqtan bizge densaýlyq saqtaýdyń ınfraqurylymyn damytýdyń biryńǵaı jospary asa qajet", - dep atap ótti mınıstr.