Medıtsınada jemqorlyqtyń baryn dárigerlerdiń ózderi moıyndaıdy - saýalnama
Ortalyq basshysynyń orynbasary Natalıa Terehovanyń aıtýynsha, saýalnama barysynda jemqorlyqqa qatysty jalpylama suraqtar qoıylǵan joq. Máselen, halyq arasynda «Tegin medıtsınalyq qyzmet kezinde dárigerge materıaldyq syı-syıapat jasadyńyz ba?» degen saýal qoıyldy. Sol kezde adamdardyń 22 paıyzy ondaı «syı-qurmet» jasaǵandaryn moıyndady. Alaıda ony óz erkimen istegenderin jetkizdi. «Shyny kerek, búginde el azamattarynyń ózi rızashylyq bildiremiz dep, dáriger mamandardy dámettirip qoıady. Ondaı qarym-qatynas mentalıtet deńgeıinde qalyptasyp otyr. Máselen, saýalnamaǵa qatysqan keıbir adamdar emotsııaǵa berilip, biz ondaı syı-syıapatty nege jasamaımyz, meniń ulym nemese qyzym týsa, olardyń dúnıege kelýine sebepker bolǵan medbıkeler de alǵysqa laıyq qoı dep, bizge qarsy suraq qoıdy. Sonda baıqap qarasaq, bul qarym-qatynas kádimgideı mentalıtet bolyp ketti. Bul tegin medıtsınalyq qyzmet qoı. Nege biz ol úshin materıaldyq syı-syıapat jasaýymyz kerek? Adamdar osyny túsinbeıdi», - deıdi N.Terehova. Degenmen, saýalnama barysynda jaýap bergen halyqtyń 6 paıyzy materıaldyq syı-syıapat berýge dárigerlerdiń ózderi emeýrin jasaǵandaryn aıtqan.
Osydan keıin jemqorlyqqa qatysty saýaldardyń paraqshasy medıtsınalyq qyzmetkerler arasynda taratyldy. Sonda dárigerlerdiń 30 paıyzy jaýap berýge qınalyp, qalys qalǵandy jón kórdi. «Endi, ashyǵyn aıtqanda, bárimiz san alýan anketalar men saýalnamalardy toltyryp jatamyz ǵoı. Sol kezde «qalys qalamyn» degendi ne úshin tańdaımyz? Birinshiden, ol suraqqa jaýap bergimiz kelmeıdi, ıaǵnı keıbir aqparatty jasyrǵan jaǵdaıda sondaı tańdaý jasaımyz. Olaı istegen jeńil. Sebebi bizdiń jaýap bermegenimizdi bireýler bilip qoıýy múmkin dep qorqamyz. Degenmen, osynyń ózi bir kórsetkish bolyp sanalady», - deıdi N.Terehova.
Saýalnama barysynda medıtsınalyq qyzmetkerler eki topqa bólindi. Bir jaǵy jemqorlyqqa qatysty halyqtyń pikiri qate qalyptasty dese, ekinshi top medıtsına salasyndaǵy jemqorlyqtyń baryn moıyndap, ondaı áreketter búkil aq halattylardyń abyroıyna nuqsan keltirip otyr dep sanaıdy. Aıta ketken jón, saýalnama anonımdi túrde uıymdastyryldy.
