Medıtsına salasynda iri kólemde bıýdjet qarajatyn jymqyrǵandar sottaldy
Aqmola oblystyq soty baspasóz qyzmetiniń málimetinshe, Kókshetaý qalalyq sotynda Qylmystyq kodekstiń 189-baby 4-bóligi 2-bólimshesi boıynsha qylmys jasady dep aıyptalǵan úsh adamǵa qatysty qylmystyq is qaraldy.
«Sot anyqtaǵandaı, Aqmola oblysy Densaýlyq saqtaý basqarmasynyń burynǵy basshysy men onyń sybaılasy - JShS dırektory elde jarııalanǵan tótenshe jaǵdaı kezeńinde ózara aldyn ala sóz baılasyp, jeke medıtsınalyq jabdyqtar (2 narkoz-tynys alý apparaty, 7 medıtsınalyq tósek-oryn jáne 1 ókpeni jasandy jeldetý apparaty) satyp alýǵa bólingen bıýdjet qarajatyn jymqyrǵan. Olardyń buryn qoldanysta bolǵan, óndiristen alynǵan jáne daıyndaýshy zaýyttardan kepildiksiz jabdyqtar satyp alǵany anyqtaldy. Bul qoldanystaǵy zańnamada qoıylatyn talaptarǵa sáıkes kelmeıdi. Sol sebepti, osy eki sottalýshy tarapynan jasalǵan qylmystyq árekettermen memleketke 86 mln 895 myń teńge - asa iri kólemde materıaldyq zalal keltirildi. Al, Aqmola oblystyq týberkýlezge qarsy dıspanserdiń bas dárigeri bolyp istegen Q. Táshmetov bolsa, qyzmetinen bosatylǵanyna qaramastan, jeke qujattarǵa qol qoıǵan. Sonyń saldarynan memleketke 25 mln teńgeden astam somada materıaldyq zalal keltirildi», - dedi vedomstvodan.
Oblystyq sottyń baspasóz qyzmeti atap ótkendeı, prokýror sottan sottalýshylardyń úsheýine 10-8 jyl merzimge bas bostandyǵynan aıyrý jazasyn surady. Jábirlenýshiniń ókili - Aqmola oblysynyń Densaýlyq saqtaý basqarmasy da zańnyń barlyq qatańdyǵy boıynsha jaza taǵaıyndaýdy surady. Sottalýshylar kinásin moıyndamady.
«Sot úkimimen Aqmola oblysy Densaýlyq saqtaý basqarmasynyń burynǵy basshysy men onyń sybaılasy - JShS dırektory Qylmystyq kodekstiń 189-baby 4-bóligi 2-bólimshesi boıynsha jazasyn ortasha qaýipsiz qylmystyq-atqarý júıesi mekemesinde óteýmen, memlekettik qyzmette jáne kvazımemlekettik sektorda laýazymdarǵa ornalasýǵa ómir boıyna tyıym salýmen 8 jylǵa bas bostandyǵynan aıyrý jazasyna kesildi. Al, Aqmola oblystyq týberkýlezge qarsy dıspanserdiń bas dárigeri bolyp istegen Q. Táshmetov Qylmystyq kodekstiń 195-babynyń 4-bóligimen jeke epızod boıynsha (aldaý nemese senimge qııanat jasaý jolymen múliktik zalal keltirý) kináli dep tanyldy. Ol «QR Táýelsizdiginiń 30 jyldyǵyna baılanysty raqymshylyq jasaý týraly» QR Zańynyń qoldanylýyna baılanysty qylmystyq jaýaptylyqtan bosatyldy. Atalǵan is boıynsha zalal tolyq kólemde óteldi», - dep tolyqtyrdy vedomstvodan.
Sonymen birge, Q. Táshmetovty «Parasat» memlekettik nagradasynan aıyrý týraly usynys engizildi. Budan bólek, sottalýshy JShS dırektorynyń qymbat avtokóligi memleket kirisine alyndy.
Prokýror men jábirlenýshiniń azamattyq talap-aryzy qanaǵattandyryldy, sottalǵandardan jábirlenýshiniń paıdasyna 86,8 mln teńge somasyndaǵy materıaldyq zalaldy óteý ortaq tártippen óndirip alyndy.
Sot úkimi zańdy kúshine engen joq.
Aıta ketsek, Aqmola oblysynda aıaqtalmaǵan qurylys nysandary boıynsha bıýdjet qarajaty negizsiz tólengeni anyqtalǵan edi.
