Medıtsına salasynda burynǵy qatelikterdi qaıtalaýǵa jol bermeý kerek - Senat spıkeri

ASTANA. QazAqparat - Medıtsına salasynda burynǵy qatelikterdi qaıtalaýǵa jol bermeý kerek. Búgin Parlament Senatynda ótip jatqan Densaýlyq saqtaý jáne áleýmettik damý mınıstrimen kezdesý barysynda sóz sóılegen palata spıkeri Qasym-Jomart Toqaev osylaı málim etti.

«Qazirgi tańda Parlament Elbasy aıqyndaǵan bes ınstıtýttyq reforma aıasyndaǵy «100 naqty qadam» Ult josparyn zańnamalyq qamtamasyz etý jumystarynyń negizgi bóligin aıaqtady. Prezıdent reformalarynyń sheńberinde depýtattar «Mindetti áleýmettik medıtsınalyq saqtandyrý týraly» zańdy qabyldady. Endigi jaǵdaı osy júıeniń qalaı jumys isteýine baılanysty bolady. Sondyqtan da, osy saladaǵy burynǵy qatelikterdi qaıtalaýǵa jol berýge bolmaıdy», - dep atap ótti Senat Tóraǵasy.

Onyń aıtýynsha, elimizde alǵashqy medıtsınalyq sanıtarlyq kómekti kúsheıtýge jáne jekemenshik medıtsınanyń damýyna qoldaý kórsetýge basa nazar aýdarý qajet. Medıtsınalyq mekemelerde korportıvtik basqarý júıesin engizýdiń mańyzy da zor bolyp tabylady.

«Sondyqtan da barsha qoǵam salalyq mınıstrlik pen basqa da jaýapty organdardan Elbasy reformalaryn sapaly túrde iske asyrýdy talap etýge quqyly», - dedi Q.Toqaev.