Medıtsına salasyna bólinetin qarajat artqanymen, kórsetiletin qyzmet sapasy áli kóterilmeı otyr

Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Saǵynbek Tursynov osylaı málim etti.

«Elbasy 2008 jyldyń 7 qarashasynda Shymkent qalasynda bolǵan Densaýlyq saqtaý mınıstrliginiń keńeıtilgen alqa májilisinde sońǵy úsh jylda elimizdegi medıtsınalyq kómek kórsetýdiń sapasy jónindegi shaǵymdar 6 esege artqanyn, olardyń 70 paıyzynyń shaǵymy oryndy ekendigin aıtqan bolatyn. Odan beri de densaýlyq saqtaý salasyn damytý, medıtsınalyq qyzmet sapasyn jaqsartý týraly Elbasy da, depýtattar da aıtýdaı-aq aıtyp keledi. Alaıda medıtsına salasyna bólinetin qarjynyń jyl sanap artyp otyrǵanyna qaramastan qyzmet kórsetý sapasy sol qalpynda qalyp keledi», - dedi depýtat. Onyń aıtýynsha, ótken jyldyń ózinde Densaýlyq saqtaý mınıstrligine 2 myńnan asa adamnan shaǵym-aryzdar túsken. Onyń ústine búgingi kúni jurtshylyq dıagnozdy dál qoıýǵa qatysty shaǵymdary da kóp. «Áli kúnge náreste men ana ólimi joǵary. Tipti artyp keledi. Máselen, 2003 jyly 100 myń adamǵa shaqqanda shyǵyn sany 42,1 adamdy qurasa, 2007 jyly bul kórsetkish 46,8 adamǵa jetken. Odan bergi úsh jylda da bul másele qıyn qalpynda qalyp otyr. Alaıda adam ólimine jaýap berip jatqan adam az, joqtyń qasy deýge bolady. Dárigerdiń qateliginen adam ómiri qıylǵan, múgedek bolyp qalǵan jaǵdaılar týraly apta saıyn buqaralyq aqparat quraldarynan estip, oqyp jatamyz. Alaıda oǵan jaýap berip, is sotqa deıin jetip jatqandary neken saıaq», - deıdi depýtat.

Sonymen qatar S. Tursynov Halyq densaýlyǵy jónindegi Kodekstiń olqylyqtaryna da toqtaldy. «Jańa zań boıynsha árbir medıtsınalyq mekeme istegen jumysynyń kólemine, jasaǵan operatsııasynyń sanyna qaraı qarjylanady. Bul óz kezeginde operatsııanyń kóbeıýine ákelip soǵýda. Ekinshi, úshinshi balany jaryp alý, naqty dıagnoz qoıylmaı jatyp operatsııa jasaý jıilep ketti. Osynyń bárin saralaı kele densaýlyq saqtaý salasyn aqparattandyrý, árbir dárigerdiń jumysyn baǵalaý, jaqsy jumys isteıtin, Gıppokrat antyna berik mamandardy kótermelep, qatelik jibergen dárigerdi tıisti jaýapqa tartý júıesin qalyptastyrýymyz qajet. Adam ólimine, múgedektikke jetkizgen oqıǵalardy tirkeý, saraptaý júzege asýy tıis», - dedi depýtat.