Medıtsına nysandarynyń qurylysyna qatysty normatıvti qaıta qaraý qajet - senator Bektaev
NUR-SULTAN. QazAqparat - QR Parlamenti Senatynyń depýtaty Álı Bektaev densaýlyq saqtaý nysandarynyń qurylysyna qatysty normatıvti qaıta qarastyrý qajettigin aıtty, dep habarlaıdy QazAqparat tilshisi.
«Bizge kóptegen adam júginip jatady. Ásirese, halyq tyǵyz ornalasqan Túrkistan oblysynan kóp. Aıtalyq, taıaýda 350 myń adam turatyn Jetisaı aýdandyq máslıhatynan hat kelip tústi. Barlyq aýylda arýhanalardy jaýyp tastaǵandyqtan olar aýdandyq aýrýhanaǵa barýǵa májbúr. Al onyń kelýshilerdi qabyldaý múmkindigi shekteýli», - dedi ol búgin Senattaǵy «Óńir» depýtattyq tobynyń otyrysynda.
Depýtat aýdan ortalyǵynyń aýrýhanasy 350 myń adamǵa medıtsınalyq qyzmet kórsetýge qaýqarsyz ekendigin aıtty. Sondyqtan ol elimizdiń Densaýlyq saqtaý mınıstrligi bul máselege nazar aýdaryp, osydan 10 jyl buryn qabyldanǵan aýrýhanalar men emhanalar salýǵa qatysty normatıvti qaıta qarastyrý qajettigin atap ótti.
«Ol kezde bıýdjette qıyndyqtar boldy, jetispedi. Sondyqtan jer shalǵaılyǵynan (medıtsınalyq mekemelerdi - avt) jaýyp tastadyq. Qazir bul máseleni qaıtadan qarastyrý qajet, halyq sany artyp keledi, kóshi-qon da jaqsy»,- dedi Á.Bektaev.
