Medıtsına mekemelerinen aqsha bopsalap kelgen eki túrkistandyq ustaldy

TÚRKІSTAN. QazAqparat - Túrkistan oblysynda medıtsına qyzmetkerlerin bopsalap keldi degen kúdikpen eki turǵyn ustaldy. Olar Maqtaaral jáne Jetisaı aýdandarynda ornalasqan medıtsına mekemeleriniń qarjylyq qyzmeti týraly málimetti taratpas úshin aqsha talap etken, dep habarlaıdy QazAqparat tilshisi.

«Krımınaldyq polıtsııa basqarmasyna medıtsına mekemesiniń biriniń qyzmetkeri aryzben júgindi. Onyń aıtýynsha, belgisiz bireýler mekeme abyroıyna nuqsan keltiretin málimetterdi jarııa etemiz, baqylaýshy organdardyń jospardan tys tekserýin uıymdastyramyz dep qorqytyp, odan 32 mıllıon teńge bopsalaǵan. Atalǵan jaıtty polıtseıler QR QK-niń 194-baby 4-bóligi «Asa iri mólsherdegi bopsalaý« boıynsha sotqa deıingi tergep-tekserýdiń biryńǵaı tizilimine tirkedi. Qylmystyq topty ustaý jáne qylmysty ashý maqsatynda Túrkistan oblysy boıynsha PD Krımınaldyq polıtsııa basqarmasy men QR Ulttyq qaýipsizdik komıteti departamentiniń qyzmetkerlerinen arnaıy top qurylyp, kezek kúttirmeıtin tergeý jumystary kesheni júrgizildi. Jedel-izdestirý is-sharalary kezinde Jetisaı qalasyndaǵy dámhanalardyń birinde iri kólemde aqsha qarajatyn bopsalap, alyp jatqan Jetisaı qalasynyń turǵynyn ustadyq. Kúdiktiden aıǵaqty zat retinde 32 mln teńge kóleminde aqsha tárkiledik», - dep atap ótti oblystyq Polıtsııa departamenti bastyǵynyń orynbasary Qurmanbek Sahov.

Qurmanbek Sahovtyń aıtýynsha, seziktiniń sybaılasy Shymkent qalasynan ustalǵan.

«Shymkent qalasyndaǵy mekemelerdiń biriniń janynda ótkizilgen tergeý áreketteriniń nátıjesinde Túrkistan oblystyq PD Krımınaldyq polıtsııa basqarmasynyń jedel ýákilderi, UQKD qyzmetkerleri jáne Shuǵyl áreket etý arnaıy jasaǵy birlesip, ekinshi kúdikti – Maqtaaral aýdanynyń turǵynyn ustadyq.

Búginde kúdikti ekeý ýaqytsha ustaý ızolıatoryna qamaýǵa alyndy. Qazirgi ýaqytta ustalǵandarǵa qatysty qajetti jedel-tergeý amaldary júrgizilýde», - dedi PD bastyǵynyń orynbasary Q.Sahov.