Medıtsına mamandarynyń shetelge kóptep ketýi baıqalady - komıtet

NUR-SULTAN. QazAqparat – Sońǵy 5 jylda Qazaqstanda medıtsına kadrlarynyń tapshylyǵy aıryqsha baıqalyp otyr, dep habarlaıdy QazAqparat tilshisi.

«2017-2021 jyldary dárigerler tapshylyǵy eki esege, 10 myńnan 23 myńǵa deıin ulǵaıdy. Qazirgi ýaqytta bul tapshylyqty jabý úshin laýazymdar biriktirilip jatyr. Biriktirýdiń jalpy koeffıtsıenti shamamen 1,5-2 stavka bolyp otyr. Osynyń barlyǵy medıtsına mamandaryna úlken júkteme túsiredi», - dedi QR Esep komıteti ekonomıkanyń naqty sektoryna aýdıt júrgizý departamenti dırektorynyń orynbasary Nurlan Qatrenov kýlýarda.

Júktemeden bólek, spıker dárigerlerge shaǵymdar sanynyń 2 esege artqanyn atap ótti. Densaýlyq saqtaý mınıstrliginiń vedomstvolyq baǵynysty uıymdaryna bólingen bıýdjet qarajatyn paıdalanýdyń tıimdiligine júrgizilgen aýdıt nátıjesinde orta eseppen bir jalpy praktıka dárigerine 1200-ge jýyq patsıent tıesili ekeni anyqtaldy.

«Munyń bári árıne túsinikti, basty sebepteriniń biri – joǵary júkteme bolyp otyr. Medıtsınalyq bilimi bar mamandardyń shetelge kóptep ketýi baıqalady. Sońǵy 5 jylda 5 myńnan astam maman shetelge ketken», - dedi N.Katrenov.

Sonymen qatar spıker medıtsınalyq bilimi bar mamandardyń qartaıýyna da basa nazar aýdardy. Búgingi tańda zeınet jasyna jetken kásibı belsendi dárigerlerdiń sany shamamen 30%-ǵa jetken.

Buǵan deıin Esep komıteti Dárilik zattar men medıtsınalyq buıymdardy saraptaý ulttyq ortalyǵy tolyq jasalmaǵan jáne iske qosylmaıtyn baǵdarlamalyq jasaqtama úshin 726,3 mln teńge jumsaǵanyn aıtqan edi.