Medıtsına mamandaryn qatań irikteýden ótkizemiz - mınıstr Birtanov

ASTANA. QazAqparat - QR Densaýlyq saqtaý mınıstrligi medıtsına mamandyqtary boıynsha bilim alyp júrgen jastardyń bilimin qatań tekserý sharalaryn bastamaqshy, dep xabarlaıdy QazAqparat tilshisi.

«Biz medıtsına túlekteriniń bilimin joǵary oqý ornyn bitirgen kezde ǵana emes, oqý kezinde de qatań baqylaýdy kózdeımiz. Qazir biz osy máseleni qarastyryp jatyrmyz. Oqýdyń basynda, sosyn birinshi-ekinshi kýrstan keıin bolashaq dárigerlerdi jaqsylap turyp iriktep otyrý qajet. Bul - xalyqaralyq tájirıbe. Sebebi bilimi joq mamandarǵa bıýdjetten qyrýar qarjy jumsalady. Sondyqtan ondaı stýdentterdi der kezinde anyqtaý qajet. Áıtpese, ózderi oqýdy bitirgende dıplom ala almaı, qınalyp júredi», - dedi mınıstr Eljan Birtanov xalyq aldynda esep berý kezdesýi kezinde.

Mınıstrdiń aıtýynsha, dárigerlerdiń biliktiligin tekserý jumysy da kúsheıtiledi. Búginde dárigerler men medbıkelerdiń bilimin tekserý sharalaryn kommertsııalyq uıymdar atqarady. «Biz ony úkimettik emes uıymdarǵa berýdi kózdeımiz. Dárigerler qaýymdastyqtary osy jumysty ózderi júrgizýi tıis. Sonda sybaılas jemqorlyq ta azaıady», - dep atap kórsetti mınıstr.

Aıta keteıik, búgin QR Densaýlyq saqtaý mınıstri Eljan Birtanov xalyq aldynda esep berdi. Onyń aıtýynsha, búginde jyl saıynǵy vaktsınatsııadan bas tartyp jatqan azamattar az emes. Sonyń ishinde dinı kózqarasqa baılanysty óz balasyna ekpe salmaıtyndar da bar.  Sondaı-aq, mınıstr jedel járdemniń jetýi tıisti ortasha ýaqytyn jarııalady.