Medıtsına qyzmetkerleriniń jalaqysyn kóterýge 132 mlrd teńge bólinedi - ÁMSQ

NUR-SULTAN. QazAqparat – Áleýmettik medıtsınalyq saqtandyrý qory medıtsına qyzmetkerleriniń jalaqysyn kóterýge 132 mlrd teńge baǵyttaıdy, dep habarlaıdy QazAqparat tilshisi.

Áleýmettik medıtsınalyq saqtandyrý qorynyń basqarma tóraǵasy Bolat Tókejanov Ortalyq kommýnıkatsııalar qyzmetinde osyndaı jańalyǵyn bólisti.

«Dárigerlerdiń jalaqysyn 30% deıin jáne orta medıtsına qyzmetkerleriniń jalaqysyn 20% deıin arttyrýǵa 132 mlrd teńge bólindi. Jalaqyny arttyrý Áleýmettik medıtsınalyq saqtandyrý qorynyń medıtsınalyq qyzmetterge aqy tóleý tarıfterinde kózdelgen. Qazirgi ýaqytta elimizdegi dárigerler sany 76 myń shtattyq birlikti quraıdy, onyń 32 myńy – beıindi mamandar», - dedi qordyń basqarma tóraǵasy.

Medıtsına qyzmetkerleriniń jalaqysyn kezeń-kezeńimen 2023 jylǵa qaraı ekonomıkadaǵy ortasha jalaqydan eki jarym ese joǵary deńgeıge deıin arttyrý kózdelgeni belgili.

«2021 jyldyń 1 qańtarynan bastap 247 myń medıtsına qyzmetkeriniń jalaqysy ósti. 30% - dárigerlerdiń, 20% orta medıtsına qyzmetkerleriniń eńbekaqysy ulǵaıdy. Osylaısha, 2023 jyly dárigerlerdiń ortasha jalaqysy shamamen 561 myń teńgeni, orta medıtsınalyq qyzmetkerlerdiń jalaqysy 210 myń teńgeni quraıdy», - dedi Bolat Tókejanov