Medıtsına qyzmetkerlerine ústemeaqy tólenýi jaǵdaıymyzdy jaqsartty – shymkentik dáriger

ShYMKENT. QazAqparat – Búkil álemdi alańdatyp otyrǵan juqpaly indettiń aldyn alýda shymkenttik dárigerler qaýymy da naǵyz qaharmandyqtyń úlgisin tanytýda. Qalalyq jedel járdem qyzmeti stansasynyń dárigeri Sattarhan Qurbanhodjaev eldegi tótenshe jaǵdaı engizilgennen beri jumys barysy ońaı bolmaı turǵanyn aıtty, dep habarlaıdy QazAqparat tilshisi.

Medıtsına salasynda on jylǵa jýyq eńbek ótili bar balalar dárigeri qaýipti indet shyqqaly jumystaǵy jaýapkershilik eki esege artty dep otyr. Onyń sózinshe, saqtyq sharalary kúsheıtilgen, árbir shaqyrtýǵa arnaıy daıyndalǵan kıimdermen barady.

«Jumys burynǵydan qıyndaı tústi. Shaqyrtaýlar sany azaıǵanymen, ýaıym da joq emes. Degenmen saqtanatyn maska, qolǵap, antıseptıkter jetkilikti. Kıimderimizdi de jıi aýystyryp turamyz. Shaqyrtýlardan keıin demalatyn bólmelerimiz de bar. Koronavırýsqa kúdikti retinde shaqyrtýǵa barǵandar dereý karantınge jatqyzylady. Ázirge men ondaı shaqyrtýǵa bara qoıǵan joqpyn. Soǵan qaramastan úıde ózimdi oqshaýlap júrmin. Ata-anam men kelinshegimnen, basqa da baýyrlarymnan alystaý júremin. Sebebi, men aýyrmaǵan kúnniń ózinde vırýs aýamen tarap ketýi múmkin»,- deıdi dáriger.

Sattarhan Qurbanhodjaev osyndaı qıyn jaǵdaı kezinde dárigerlerdiń eńbegi baǵalanyp, memleket tarapynan jaǵdaılar jasalyp jatqanyna rızashylyǵyn bildirdi. Onyń aıtýynsha, tótenshe jaǵdaı kezinde medıtsına qyzmetkerlerine ústemaqynyń berilýi turmystyq jaǵdaılaryn jaqsarta túsken.

«Ár aı saıyn, kezekshilik etýimizge qaraı 180-200 myń teńgedeı jalaqy alamyz. Al, qazir oǵan qosymsha 425 myń teńge ústemeaqy berilip jatyr. Máselen bizge naýryz aıynda 15 kúnge 212 myń teńge tólendi. Bul qarajat materıaldyq jaǵdaıymyzdy birshama kóterip tastady. Máselen ózim nesıemdi jaýyp tastadym. Azyn-aýlaq bereshekterimdi berdim. Biraz máselemdi sheship, alańsyz jumys isteýdemin» ,- deıdi jedel járdem qyzmetiniń dárigeri.