Medıtsına qyzmetkerlerine ústemaqy tóleý barysynda birqatar zańsyzdyq áshkerlendi

NUR-SULTAN. QazAparat -Memlekettik hatshy Qyrymbek Kósherbaev QR Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııanyń otyrysyn ótkizdi, dep habarlaıdy Aqorda.

QR Memlekettik hatshysy Qyrymbek Kósherbaevtyń tóraǵalyǵymen Qazaqstan Respýblıkasy Prezıdenti janyndaǵy Sybaılas jemqorlyqqa qarsy is-qımyl máseleleri jónindegi kezekti komıssııa otyrysy ótti. Jıynda pandemııamen kúresýge bólingen qarajattyń tıimdi jumsalýy jáne densaýlyq saqtaý mınıstrligindegi sybaılas jemqorlyqqa qarsy qabyldanyp jatqan sharalar jaıy talqylandy.

Memleket basshysy Qasym-Jomart Toqaevtyń tapsyrmasymen álemdi jaılaǵan indetpen kúresý úshin tıisti sharalar qolǵa alynyp, bıýdjetten aýqymdy qarajat bólindi. Bul qarajat negizinen naýqastardy emdeýge, el azamattaryn qajetti dári-dármek, qorǵanysh quraldarymen, medıtsınalyq qural-jabyqpen qamtýǵa jáne dárigerlerdiń jalaqysyna ústemaqy qosýǵa baǵyttaldy.

QR Tuńǵysh Prezıdenti – Elbasy N.Á.Nazarbaev otandastyrymyzdy qabyldanǵan sharalardy qoldaýǵa shaqyrdy. Sondaı-aq koronavırýs indetine qarsy is-qımyl máseleleri Qaýipsizdik keńesiniń otyrysynda qaraldy.

Pandemııaǵa qarsy qabyldanǵan sharalar indettiń betin qaıtarǵanymen, quqyq qorǵaý jáne tıisti baqylaýshy mekemeler bıýdjetten bólingen qarjynyń keıde tıimsiz paıdalanylǵanyn anyqtady. Atap aıtqanda, mundaı jaǵdaı medıtsınalyq qural-jabdyqtardy satyp alý, emhana qyzmetkerlerine ústemaqy tóleý kezinde laýazymdy tulǵalardyń tarapynan oryn alǵan.

Sonymen qatar Sybaılas jemqorlyqqa qarsy kúres agenttigi densaýlyq saqtaý mınıstrligi men oǵan qarasty mekemelerdegi memlekettik satyp alý kezindegi sybaılas jemqorlyq táýekelderin anyqtady. Al Qarjylyq monıtorıng agenttigi dári-dármek pen urlyqy ónimderdi alyp-satý boıynsha aýqymdy jumys júrgizgen. Qarjy mınıstrligi medıtsına qyzmetkerlerine ústemaqy tóleý barysynda birqatar zańsyzdyqtar oryn alǵanyn áshkereledi.

Jıynda koronavırýspen kúreske bólingen qarjynyń tıimdi jumsalýy boıynsha jáne sybaılas jemqorlyqqa qarsy qabyldanǵan is-qımyl sharalary jóninde QR Densaýlyq saqtaý mınıstri A.Tsoı jáne birqatar oblys ákimderi baıandama jasady.

Komıssııa otyrysynda jaýapty organ basshylaryna jemqorlyqty anyqtap, aldyn-alýmen qatar, Memleket basshysynyń turmystyq jemqorlyqty joıý jónindegi tapsyrmasyn oryndaý úshin tıisti sharalar qabyldaý tapsyryldy.

Jıyn sońynda Memlekettik hatshy kóterilgen máseleler boıynsha naqty tapsyrlar berip, oryndalýy qatań baqylaýǵa alynatynyn jetkizdi.