Medıtsına qyzmetkerlerine baspana salamyz - Isekeshev
ASTANA. QazAqparat - Elordada medıtsına salasyn barynsha damytýdyń arqasynda xalyqtyń ómir súrý uzaqtyǵy 75,4 jylǵa deıin jetti.
Bul respýblıka boıynsha ortasha kórsetkishten 3 jylǵa joǵary. Búgin Medıtsına qyzmetkerleri kúnine arnalǵan saltanatty sharada qala basshysy Áset Isekeshev osyndaı málimetpen bólisti, dep xabarlaıdy QazAqparat tilshisi.
«Jańa aýrýxanalar men ozyq texnologııalardyń arqasynda statsıonardaǵy adam ólimi eki esege azaıdy. Sońǵy eki jylda birqatar nysandar paıdalanýǵa berildi. Aldaǵy ýaqytta «Óndiris» turǵyn úı aımaǵynda patologoanatomııalyq bıýro men medıtsına qyzmetkerlerine arnalǵan turǵyn úı salynady. Budan bólek, burynǵy temirjol emxanasynyń ornynda jańa kópsalaly klınıkany salýdy josparlap otyrmyz. Otbasy densaýlyǵy ortalyqtaryn ashý men «Úı doktory» bastamalaryn iske asyrý sharalary jalǵasa beredi», - dedi Isekeshev.
Ákimniń sózine qaraǵanda, qalada medıtsına salasyn damytýǵa respýblıkalyq bıýdjetten de, jergilikti bıýdjetten de bólinetin qarjynyń kólemi artyp keledi.
Aıta keteıik, búgin Astanada medıtsına salasy qyzmetkerleriniń kúnine arnalǵan saltanatty shara ótti. Sol jerde qala ákimi Áset Isekeshev úzdik dárigerlerge páter kiltterin tabystady .
Shara aıasynda taratylǵan málimetke sáıkes, Astanada emdeletin sheteldikterdiń sany jyl ótken saıyn artyp keledi.
