Medıtsına qyzmetkerlerin mindetti saqtandyrý týraly zań 2013 jyly qabyldanady
ASTANA. 27 shilde. QazAqparat - 2013 jyly Qazaqstanda medıtsına qyzmetkerlerin kásibı qatelikterden mindetti saqtandyrý týraly zań qabyldanatyn bolady, dep habarlady QR Densaýyq saqtaý vıtse-mınıstri Erik Baıjúnisov pm.kz saıtyna bergen suhbatynda.
«Búgingi kúni dárigerlerdiń ózderin zańdyq jáne áleýmettik qorǵaýdyń zańnamalyq negizin qurýdyń úlken qajettiligi týyp otyr. 2013 jyly tıisti zań qabyldanatyn bolady», - dedi E.Baıjúnisov.
Vıtse-mınıstrdiń aıtýynsha, medqyzmetkerlerdi saqtandyrýdyń eki úlgisi bar. Onyń birinshisi, Amerıkadaǵy sııaqty saqtandyrý kompanııalarynyń kópshiligi ár dárigerdi jeke baǵdarlama boıynsha saqtandyratyn naryqtyq model. Budan basqa, memlekette biryńǵaı saqtandyrý qory bolǵan jaǵdaıdaǵy ózara saqtandyrýdyń jalpyǵa ortaq túri de bar.
«Bul memlekette dárigerdiń qateligi saldarynan bolǵan moraldyq jáne materıaldyq shyǵyndardy baǵalaıtyn belgili bir ınstıtýt qurýdy qarastyrady», - dep qosty E.Baıjúnisov.
Vıtse-mınıstrdiń aıtýynsha, qazirgi kezde arnaıy jumys toby model tańdaý jumysymen aınalysýda, onyń barlyq oń jáne teris jaqtaryn saralap baryp belgili bir usynystar ázirlenedi.
«Memleket basshysy óziniń «Qazaqstandy áleýmettik jańǵyrtý: Jalpyǵa Ortaq Eńbek Qoǵamyna qaraı 20 qadam» atty baǵdarlamalyq maqalasynda sheshim qabyldaýdy talap etip otyrǵan máseleler týraly naqty ári óte ýaqytyly aıtyp berdi. Onyń ishinde medqyzmetkerlerdi kásibı qatelikterinen mindetti saqtandyrý máselesi da bar. Bul densaýlyq saqtaý álemindegi eń mańyzdy taqyryp», - dep aıaqtady sózin E.Baıjúnisov.
