Medıtsına qyzmetkerleri kúni: Isekeshev astanalyq dárigerlerge páter kiltin tabystady
ASTANA. QazAqparat - Medıtsına qyzmetkerleri kúni qarsańynda Astana qalasynyń ákimi Áset Isekeshev dárigerlerge páter kiltin tabystady, dep habarlaıdy Qazaqparat tilshisi.
Atap aıtqanda, Astana qalasy Onkologııalyq ortalyǵynyń onkolog-hırýrgy Ánýar Ábdikárimov, №1 qalalyq aýrýhanadaǵy tamyrlyq hırýrgııa bóliminiń dáriger-angıohırýrgy Azamat Abdýllınov, №1 qalalyq aýrýhananyń travmatolog-ortoped dárigeri Aıan Súleımenovterge jańa páter kilti saltanatty túrde tabys etildi.
Sondaı-aq, №2 Balalar aýrýhanasy hırýrgııalyq ınfektsııalar bóliminiń meńgerýshisi Jumataı Mákenov, №2 balalar Jedel hırýrgııa qabyldaý bóliminiń travmatolog-ortopedi Oljas Baınazarov jáne qalalyq Densaýlyq saqtaý basqarmasynyń bas mamany Janna Esqalıeva baspanaly boldy.
«Qalamyzda dárigerler men medıtsına qyzmetkerleri asqan jankeshtilikpen eńbek etip keledi. Jyl saıyn Astanaǵa 50-100 myń adam keledi jáne qalalyq emhanalarǵa aýyr júkteme túsedi. Kúndelikti elorda emhanalaryna 8,5 myń turǵyn keledi, 400-ge jýyq naýqas aýrýhanaǵa jatqyzylady, 120-ǵa jýyq aýyr orta jasalady, jedel járdem qyzmeti 1 500 shaqyrtýǵa qyzmet kórsetedi. Bul tsıfrlardyń artynda sizderdiń baǵa jetpes eńbekterińiz tur», - dedi Áset Isekeshev marapattaý rásiminde.
Aıta keteıik, jyl saıyn Qazaqstanda maýsym aıynyń úshinshi jeksenbisinde medıtsına qyzmetkerleri kúni atalyp ótedi.
