Medıtsına qoǵamdastyǵy áýe apatynda qaza bolǵandarǵa arnap 1 kúndik jalaqysyn aýdarady
ALMATY. QazAqparat - Búgin Almatyda QR Investıtsııalar jáne damý vıtse-mınıstri Roman Sklıardiń jetkshiligimen apat ornynda jumys jasaǵan arnaıy komıssııa baspasóz máslıhatyn ótkizdi.
«Respýblıkalyq sanıtarlyq avıatsııa ortalyǵy» respýblıkalyq memlekettik kásipornynyń ókili Nurlan Otarbaev apattan qaza bolǵan dárigerlerdiń otbasyna qandaı kómek kórsetiletinin aıtty.
«Saqtandyrý tólemderinen bólek medıtsınalyq qaýymdastyq, respýblıkalyq ujymdar 1 kúndik jalaqyny aýdarý týraly biraýyzdan sheshim qabyldady. Men oılaımyn, bul sheshimdi aımaqtyq, oblystyq medıtsınalyq mekemeler de qoldaıdy», - dedi Nurlan Otarbaev.
Onyń aıtýynsha, 30 jastaǵy kelinshek bosanǵan soń 16 táýlikte jaǵdaıy asqynǵan. Jaǵdaıy óte aýyr bolǵandyqtan, oblystyq mamandar Almatydaǵy ǵylymı ınstıtýt mamandarymen baılanysqa shyǵady.
«Instıtýt mamandary men oblystyq klınıka ókilderi arasynda ota jasaý kerektigi týraly kelisim jasalady. Otadan soń bilikti reanımatolog pen bilikti gınekolog mamandy jiberý týraly sheshim qabyldanady. Bul professorlar naýqas áıeldiń operatsııadan keıingi qalpyna kelýine kómektesýi tıis bolǵan. Qazir áıel áli de aýyr jaǵdaıda. Oblystyq dárigerler telekonferentsııa arqyly áli de saǵat saıyn baılanysyp jatyr», - dedi N.Otarbaev.
Eske salaıyq, 3 qazan kúni Almaty-Shymkent baǵytynda sanıtarlyq avıareısin oryndaǵan «AN-28» ushaǵy saǵat 18:47-de Almatydan 28 shaqyrym qashyqtyqta radardan joǵalyp ketti. Sosyn saǵat 19.15-te ushaq Almaty oblysy Іle aýdanynyń Mejdýrechınsk aýyly mańynda apatqa ushyrap, órtengeni habarlandy. Bortta bolǵan 5 adam ekıpaj músheleri - áýe kemesiniń komandıri Gennadıı Tsoı, ekinshi ushqysh Evgenıı Kýtafın, avıatehnık Beıshıbek Ahmatbaev, Akýsherııa, gınekologııa jáne perınatalogııa ǵylymı ortalyǵynyń professory, dáriger akýsher-gınekolog Patsaev Talǵat Anapıuly men Kardıologııa jáne ishki aýrýlar ǵylymı-zertteý ınstıtýtynyń reanımatolog dárigeri Artyqbaev Jánibek Túkenuly sol jerde qaza tapty.
Dərigerler OQO-daǵy jas bosanyp aýyr jaǵdaıda jatqan kelinshekti qaraýǵa shaqyrtylǵan.
