Medıtsına ǵylymdarynyń doktory, epıdemıolog Sáken Ámireev ómirden ótti
ALMATY. QazAqparat - S.Asfendııarov atyndaǵy Qazaq ulttyq medıtsına ýnıversıtetiniń professory, epıdemıolog-vaktsınolog, medıtsına ǵylymdarynyń doktory Sáken Ámireev ómirden ótti, dep habarlaıdy QazAqparat tilshisi.
Qazaqstan Respýblıkasynyń densaýlyq saqtaý salasy men S.D.Asfendııarov atyndaǵy Qazaq ulttyq medıtsına ýnıversıteti úlken, orny tolmas qazaǵa ushyrady. Búgin tańerteń Qazaqstandaǵy epıdemıologııa jáne vaktsınatsııa mektebiniń negizin qalaýshy, Medıtsına ǵylymdarynyń doktory, professor Ámireev Sáken Ámireuly koronovırýstan kóz jumdy.
Qaraly habardy S.Asfendııarov atyndaǵy Qazaq ulttyq medıtsına ýnıversıtetiniń baspasóz qyzmeti rastady.
«S.Asfendııarov atyndaǵy QazUMÝ-niń oqytýshylary, qyzmetkerleri men stýdentteri Sáken Ámireulynyń týystary men jaqyndaryna qaıǵylaryna ortaqtasyp kóńil aıtady»,- delingen habarlamada.
Cáken Ámireev 1940 jyly 5 qańtarda Almaty oblysy Qabanbaı (burynǵy Andreev) aýdany Muqaı aýylynda dúnıege keldi, 1957 jyly Ekpindi orta mektebin tamamdady. 1958-1964 jyldary Almaty memlekettik medıtsına ınstıtýtynda oqyp dáriger- epıdemıolog mamany ataǵyn aldy.
1964 jyly KSSR Densaýlyq saqtaý mınıstrliginiń mıkrobıologııa epıdemıologııa jáne gıgıena ǵylymı-zertteý ınstıtýtyna kishi ǵylymı qyzmetker bolyp qabyldandy.1967-1970 jyldary AMMI aspıranty. 1970 jyly medıtsına ǵylymdarynyń kandıdaty ataǵyn qorǵady.
Professor S.Ámireev brýtsellez problemalarynyń ártúrli salalary boıynsha 2 monografııa, 4 ǵylymı jınaqtar, 6 tomdy ǵylymı-ádebıetterge sholýlar jaryq kórdi, 5 doktorlyq, 12-kandıdattyq dıssertatsııalar qorǵaldy (ǵylymı-jetekshi, ǵylymı-keńesshi boldy).
Aıta keteıik, ol pandemııanyń alǵashqy kúnderinen bastap koronavırýspen kúreste aldyńǵy qatarda boldy.
