Medıtsına boıynsha tegin bilim alý: Jas mamandarǵa jańa talaptar qoıylady
«Negizi, basqa memlekettermen salystyrǵanda, bizde maman tapshylyǵy qatty baıqalmaıdy. Tipti, rezerv te bar. Alaıda kadr taratý jumysy durys jolǵa qoıylmaǵan. Máselen, bir mamandyq boıynsha tym kóp adam daıyndalsa, endi bir mamandyqqa adam jetispeıdi. Sodan naqty bir mamandyqtar boıynsha tapshylyq týyndap otyr. Máselen, jalpy dárigerler, akýsher-gınekologtar men reanımatologtar jetispeı jatyr», - dedi E.Birtanov xalyqqa esep berý kezdesýi kezinde.
Mınıstrdiń aıtýynsha, búginde tapshylyq máselesin sheshý úshin tıisti sharalar qolǵa alyndy. Sonyń ishinde mamandardy taratý, qajetti jerde dárigerlerdi yntalandyrý jáne taǵy basqa sharalar bar. Mınıstrlik medıtsına boıynsha tegin bilim alǵan jastardyń oqý aqysyn óteý tetigin de paıdalanady.
«Kelesi jyldan bastap barlyq joǵary oqý oryndarynda memlekettik grantpen bilim alǵandar mindetti túrde oqýdy óteıtin bolady. Talap boıynsha úsh jyl memlekettik mekemelerde jumys isteý kerek. Biz taǵy bir normatıvtik qujattardy rásimdeımiz. Sonyń negizinde jas mamandardy memlekettik mekemelerge jiberip qana qoımaı, naqty qaı jerde maman tapshylyq bar, sol jerge baǵyttaıtyn bolamyz», - dep atap kórsetti E.Birtanov.
Aıta keteıik, búgingi kezdesý kezinde mınıstr fast-fýdty shekteýge qatysty pikir bildirdi. Budan bólek, Astanadaǵy perzentxanada analarynan aıyrylǵan eki náresteniń jaǵdaıy jaıynda aıtyp berdi. Jedel járdem máselesi de sóz boldy. Mınıstrdiń oıynsha, jasandy uryqtandyrýdy bıýdjet esebinen qarjylandyrǵan durys emes. Jospar boıynsha týberkýlezge qarsy jańa preparattar tegin beriledi. Sondaı-aq, mınıstr medıtsına qyzmetkerleriniń jalaqysyn qalaı kóterýge bolatynyn aıtty.