Medıatorlardyń ádep kodeksi ázirlenip jatyr
ASTANA. KAZINFORM – Medıatorlardyń ádep kodeksi ázirlenip jatyr. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Qazaqstan Respýblıkasynyń «Kásiptik biliktilikter týraly» Zańy 5-babynyń talaptaryna sáıkes, «Koýchıng qyzmeti (kásibı koýchıng)» kásiptik standarty bekitildi. Atalǵan standart kásibı koýchterdiń biliktiligine, quzyretterine, bilimderine, daǵdylaryna jáne etıkalyq qaǵıdattaryna qoıylatyn talaptardy aıqyndaıdy. Kásiptik standartta biliktilik talaptary belgilengen koýchıngtiń 9 baǵyty boıynsha kásipter kartochkalary kózdelgen. Atap aıtqanda, koýchter ózderiniń biliktiligin joǵary biliminiń bolýy arqyly, sondaı-aq sertıfıkattaýdan ótý arqyly rastaıdy, - dedi Úkimet basshysy jaýabynda.
Onyń atap ótýinshe, qazirgi ýaqytta elimizde ICF (International Coaching Federation) jáne ACU (Association for Coaching University) sııaqty halyqaralyq sertıfıkattar tanylady. Atalǵan sertıfıkattar zańnamalyq deńgeıde kásibı koýchıng qyzmetin júzege asyrý quqyǵyn beredi. Koých óz biliktiligin saqtaý úshin úzdiksiz kásibı damýdan ótýge mindetti. Atap aıtqanda, ár úsh jyl saıyn koýchıng boıynsha keminde 40 saǵat kóleminde mamandandyrylǵan oqýdan ótýi tıis.
- Koých kásibı qyzmetin júzege asyrý barysynda kásibı qaýymdastyqtyń nemese federatsııanyń Koých ádebi kodeksin saqtaýǵa jáne qyzmetterdi adaldyq, teń quqyqtylyq jáne kemsitpeý qaǵıdattaryna sáıkes kórsetýge jeke jaýapty bolady. Sonymen qatar, ádep minez-qulqy daýlar men janjaldardy syndarly túrde retteýdiń mańyzdy faktory sanalady. Osyǵan baılanysty osy jyly qurmetke negizdelgen qarym-qatynas qaǵıdattaryn saqtaýǵa jáne medıatsııa ınstıtýtyna degen senimdi arttyrýǵa baǵyttalǵan Medıatorlardyń ádep kodeksi ázirlenip jatyr, - dedi Oljas Bektenov.
Buǵan deıin bıyl medıatorlarǵa qandaı talap qoıylatynyn jazǵan edik.
