Medıanyń Jibek joly: Astana óńirlerdi biriktiredi
ASTANA. KAZINFORM - Astanada Qytaıdyń jetekshi «Jenmın jıbao» basylymynyń bastamasymen «Ortalyq Azııa – Qytaı» halyqaralyq medıaforýmy ótip jatyr. Іs-sharanyń teń uıymdastyrýshysy – Qazaqstan Respýblıkasy Prezıdentiniń Teleradıokesheni.
Forýmnyń basty taqyryby – «BAQ arqyly Jibek joly: Qytaı men Ortalyq Azııanyń ortaq taǵdyr qaýymdastyǵyn qurý». Bul talqylaýǵa Qazaqstan, Qytaı, Ózbekstan, Qyrǵyzstan, Tájikstan, Túrikmenstan elderiniń BAQ basshylary, saıasatkerler, jýrnalıster, saraptamalyq ortalyqtar men ǵylymı-zertteý ınstıtýttarynyń ókilderi qatysty.
Forým barysynda Qytaı Kommýnıstik partııasy Ortalyq Komıtetiniń 20-shy shaqyrylymynyń múshesi, Ortalyq úgit-nasıhat bóliminiń tóraǵa orynbasary, kúndelikti jumysqa jaýapty Hý Hepın Memleket basshysyna Forýmdy qoldaǵany úshin rızashylyǵyn bildirdi:
– Prezıdent Toqaev osy forýmǵa arnaıy quttyqtaý hatyn joldady. Bul Qazaqstannyń bul sharaǵa qanshalyqty mán beretinin kórsetedi. Bul qadam eki el arasyndaǵy aqparat almasýdy tereńdetip, Qytaı men Ortalyq Azııa memleketteri medıasynyń ózara yntymaqtastyǵyn nyǵaıtýǵa zor yqpal etedi. Biz Prezıdent Toqaevqa shynaıy alǵysymyzdy bildiremiz, – dedi.
Hý Hepınniń aıtýynsha, Qytaı men Ortalyq Azııanyń ortaq taǵdyr qaýymdastyǵyn qurý – qazirgi ýaqyttyń jańa jaǵdaılaryna sáıkes qabyldanǵan tarıhı tańdaý jáne bul sheshim halyqtardyń túbegeıli múddeleri men jarqyn bolashaǵyna negizdelgen.
– Qytaı Ortalyq Azııa elderimen joǵary deńgeıdegi ýaǵdalastyqtardy júzege asyra otyryp, saıası senimge, dostyq pen tatý kórshilikke negizdelgen qarym-qatynasty nyǵaıtýdy kózdeıdi. Biz birlesip «jańa altyn otyz jyldyqty» qalyptastyrýdy qalaımyz. Óıtkeni memleketter arasyndaǵy dostyq halyqtar arasyndaǵy jaqyndyqtan, al halyqtardyń jaqyndyǵy júrekten shyqqan úılesimnen bastalady, – dep atap ótti ol.
QR Prezıdenti Teleradıokesheniniń dırektory Raýshan Qajybaeva óz sózinde Uly Jibek joly álemdik qurylymnyń aýqymdy ózgeristerine kýá ǵana emes, sonymen qatar onyń qozǵaýshy kúshine aınalǵanyn atap ótti.
– «Bir beldeý, bir jol» jobasy – tek ınfraqurylym men ekonomıka ǵana emes. Bul – adamzattyń ortaq taǵdyryna negizdelgen fılosofııa. Bul ıdeıa bizge erekshe jaqyn. Biz – Uly Jibek jolynyń muragerimiz. Búgin taýar emes, ıdeıa, maǵyna men senim baılanysy jaıly aıtyp otyrǵanymyz sımvoldyq mánge ıe. Sebebi elder arasyndaǵy shynaıy jaqyndyq – adamdyq túsinik pen qyzyǵýshylyqtan bastalady. Bul úderiste BAQ-tyń rólin asyra baǵalaý múmkin emes, – dedi R. Qajybaeva.
Sondaı-aq forýmda «Jenmın jıbao» gazeti bas redaktorynyń orynbasary Fan Tszıanshan sóz sóılep, Qytaı men Ortalyq Azııanyń bes eli ekijaqty formatta ortaq taǵdyr qaýymdastyǵyn qurý týraly resmı málimdegenin aıtty.
– Adamzattyń ortaq taǵdyr qaýymdastyǵy ıdeıasy birtindep jahandyq kelisim men ortaq qundylyqqa aınalyp, qýatty qozǵalysqa ulasyp keledi. Bul tujyrymnyń alǵash ret tek ekijaqty emes, tutas óńirlik formatta qoldanylýy – taraptardyń yntymaqtastyqty jańa deńgeıge kóterýge degen umtylysyn kórsetedi, – dedi ol.
Forým aıasynda «Bir beldeý, bir jol» aqparattyq jelisiniń tanystyrylymy, «Jibek jolynyń áýeni» mýzykalyq beınebaıanynyń tusaýkeseri ótti. Sondaı-aq Qytaı men Ortalyq Azııa elderi BAQ ókilderine arnalǵan birlesken joǵary sapaly jobalar boıynsha baspasóz týry bastaldy.