MediaNet halyqaralyq jýrnalıstıka ortalyǵy BAQ-taǵy memlekettik tapsyryspen shyǵatyn materıaldarǵa monıtorıng júrgizdi
ALMATY. 9 qarasha. QazAqparat /Ádilet Musahaev/ - Memlekettik tapsyrys Qazaqstannyń aqparattyq salasyndaǵy kúdik pen kúmánǵa toly baǵyttardyń biri bolyp otyr. Alaıda jarnama berýshiler sanynyń azaıǵan tusynda, memlekettik tapsyrys aıasynda beriletin qarajat kóptegen BAQ úshin taptyrmas kiris kózi. Bul jaıynda búgin MediaNet halyqaralyq jýrnalıstıka ortalyǵynyń basshylary Almatyda ótken arnaıy baspasóz maslıhaty barysynda málimdedi.
Atalmysh ortalyq mundaı sheshimge Soros-Qazaqstan Qorynyń qoldaýymen aqparattyq saıasat salasyndaǵy memlekettik tapsyrysqa júrgizgen monıtorıng zertteýden keıin toqtalyp otyr.
MediaNet halyqaralyq jýrnalıstıka ortalyǵynyń joba menedjeri Dinmuhamed Zııadın memlekettik tapsyrysqa baılanysty júrgizilgen zertteý aıasynda onyń jaǵymdy jáne jaǵymsyz tustaryn anyqtaýǵa tyrysqandyqtaryn jetkizdi. "Oń tustaryn aıta ketsek memlekettik tapsyrys qarjy daǵdarysy kezinde BAQ-tar úshin redaktsııanyń shyǵynyn óteý úshin qajetti birden-bir qarajat kózine aınala bildi. Sonymen qatar jarnama berýshiler asa kóp bara bermeıtin qazaq tildi BAQ-qa memlekettik tapsyrystardyń kómegi tıdi jáne qazaq tiliniń damýy osy memlekettik tapsyrys aıasynda jıi kóterilip otyrdy "- dedi joba menedjeri.
Al osy memlekettik tapsyrystyń keri áseriniń biri onyń aıtarlyqtaı ashyq emestigi, bulyńǵyrlyǵy eken. "Memlekettik tapsyrysty alǵan BAQ-tan qandaı qarajatqa qol jetkizgendigi jónindegi aqparatty alý qıyndaý. Sondaı-aq kóptegen BAQ osy memlekettik tapsyrysqa senip ózderiniń jeke menedjmentterin damytýǵa kóp kóńil bólmeıtin boldy"- deıdi D. Zııadın.
MediaNet halyqaralyq jýrnalıstıka ortalyǵynyń dırektory Igor Brattsev memlekettik tapsyrysqa ıe bolǵan BAQ-tarda óz-ózine degen tsenzýra paıda bolǵandyǵyn aıtady. ıAǵnı redaktsııa nemese jýrnalıster bolashaqta memlekettik tapsyrysty ala almaı qalýdan qorqyp, ózderine belgili bir shekteýler men kedergiler qoıyp, keıbir taqyryptardy aınalyp ótýge kóshken.
"Memlekettik organdar BAQ-qa memlekettik tapsyrys aıasynda jarııalanǵan jarııalanymdardyń mazmunyna eshqandaı baqylaý júrgizbeımiz degen málimet berdi. Alaıda redaktsııalar men jýrnalıster tapsyrys aıasynda jarııalanǵan maqalalar jarııalanbas buryn memlekettik organdardyń tarpynan belgili bir tekserýler men baqylaýlardan ótetindigin jetkizdi", -dedi I.Brattsev.
Zertteý júrgizýshiler memlekettik tapsyrysty bóliske salý júıesin ózgertýdi usynady. Olardyń pikirinshe, júıeniń ashyqtyǵyn arttyrý qajet jáne qarjyny úlestirýge baqylaý júrgizetin qoǵamdyq kommısııa qurǵan jón. Sonymen qatar BAQ-ta memlekettik tapsyrys aıasynda jarııalanatyn materıaldardy arnaıy belgimen kórsetip otyrýǵa shaqyrady.
