Medıatsııa júıesin engizýde eldegi jaǵdaıdy da eskerýimiz kerek - M.Álimbekov
ASTANA. Qyrkúıektiń 17-si. QazAqparat /Aıdar Ospanalıev/ - «Biz medıatsııa júıesin engizýge asa uqyptylyqpen qaraýymyz qajet. Bizdińshe, Eýropa elderinde bul máseleni engizýden asa qaýiptenýdiń qajeti joq bolar. Al demokratııalyq jolǵa endi ǵana qadam basqan elder úshin ol basqasha sıpat alýy múmkin.
Sondyqtan biz atalmysh júıeni engizbes buryn osyndaı máselelerdi zerdelep alǵanymyz jón», dedi búgin Joǵarǵy sot tóraǵasy Musabek Álimbekov. Bul týraly ol búgin Joǵarǵy sotta Qazaqstanda medıatsııa máselelerin engizýge baılanysty ótip jatqan dóńgelek ústel otyrysynda aıtty, dep habarlaıdy QazAqparat.
Joǵarǵy sot tóraǵasynyń aıtýynsha, medıatsııa júıesi, ıaǵnı bir-birimen janjaldasqan taraptardyń úshinshi jaqtyń kelisimge shaqyrýymen tatýlasýy - búgingi tańda elimizdegi qylmystyq protsester barysynda da qoldanylyp keledi. «Biraq ol tek jekelegen taraptardyń óz erikterimen osy isti júzege asyrýǵa nıet bildirgen jaǵdaıynda ǵana qoldanylyp keldi. ıAǵnı, qoǵamnyń belgili bir toptary belgili bir másele boıynsha janjaldasqan taraptarǵa medıatr bolýǵa nıet bildirip, olardyń tatýlasýyna uıytqy bolsa ǵana atalmysh júıeni qoldanýǵa bolatyn edi. Bul jaǵdaıda sot ókilderi tek osy protsestiń qanshalyqty zańdy iske asyrylǵandyǵyn ǵana baqylaıtyn. Bul, árıne jaqsy tájirıbe. Sondyqtan onyń bolǵany durys. Degenmen ol búgingi deńgeıinde qalyp qoımaı múmkindiginshe jetildirilip otyrǵany durys. Óıtkeni medıatsııanyń tıimsiz jaǵy da bar ekendigin eskerýimiz qajet», dedi tóraǵa.
Onyń aıtýynsha, keı jaǵdaıda krımınaldyq qurylymdardyń ókilderi medıatrmyn degen jeleýmen janjaldasýshy taraptardyń isine aralasady. Shyn máninde onyń nıeti taraptardy tatýlastyrý emes óziniń aram pıǵylyn júzege asyrý. Ondaı jaǵdaılar sot tarıhynda bolǵan. «Sondyqtan bizge medıatsııa máslesinde asa saq bolǵanymyz jón. Bul rette biz eldegi qalyptasqan jaǵdaıdy da eskerýimiz kerek. Qoryta aıtqanda, bul júıeni engizý máselesine bizge asa baıyppen qarap, ony birte-birte júzege asyrǵan jón», dedi M.Álimbekov.
