Medıatsııa qyzmetine qatysty zań qabyldanatyn bolsa, sotta qaralatyn ister sany aıtarlyqtaı qysqarady - Joǵarǵy sot ókili
ASTANA. Mamyrdyń 21-i. QazAqparat /Aıdar Ospanalıev/ - Medıatsııa qyzmetine qatysty zań qabyldanatyn bolsa, sotta qaralatyn ister sany aıtarlyqtaı qysqarady.
Óz kezeginde ol sýdıalardyń jumysyn azaıtyp, olar qaraıtyn isterdiń sapasyn arttyrýǵa múmkindik beredi. Bul týraly búgin Joǵarǵy sotta «Ekijaqty tatýlastyrý ınstıtýtyn engizýdiń ózekti máseleleri» atty taqyrypta ótken dóńgelek ústel otyrysynda Joǵarǵy sottyń Azamattyq jáne ákimshilik ister jónindegi qadaǵalaý jáne sot alqasynyń tóraıymy Almaz Táshenova málim etti, dep habarlaıdy QazAqparat.
Onyń pikirinshe, zań kúshine enetin bolsa ol arazdasýshy taraptardyń bir-birine degen óshpendiligin azaıtyp, kerisinshe ózara kelisimge degen ynta-qylastaryn arttyrady. Olardyń ekijaqty tatýlastyrýǵa baǵyttalǵan tetikterdi paıdalanýlaryna múmkindik beredi. «Bolashaqta biz medıatsııanyń, ıaǵnı daýlasýshy taraptardy ózara tatýlastyrý júıesiniń tıimdi engizilýi atqarýshy óndiris sanynyń azaıýyna da alyp keledi degen senimdemiz. Sebebi daýlasýshy taraptar medıatrdyń kómegine júgine otyryp, onyń sheshimin óz erikterimen oryndaýǵa múddeli bolady. Qoryta aıtqanda, medıatsııa ınstıtýtynyń engizilýi azamattyq-quqyqtyq daýlardyń qatysýshylaryna ekonomıkalyq jaǵynan da tıimdi bolmaq», dedi Joǵarǵy sot ókili.
