Medıa-revolıýtsııa men jańa tehnologııalar bizdiń álemdi adam tanymastaı etip ózgertti - D. Nazarbaeva
Búgin Astanada ótip jatqan Eýrazııa medıa forýmy barysynda sóz sóılegen Forýmnyń Uıymdastyrý komıtetiniń tóraıymy Darıǵa Nazarbaeva osylaı málimdedi.
«On birinshi ret ashylyp otyrǵan Eýrazııa medıa forýmynyń nazarynda aýytqymas dástúrge saı - qazirgi álemniń basty oqıǵalary jáne olardyń buqaralyq aqparat quraldary aınasynda kórinis tabýy bolmaq. Búgingi álem qarama-qaıshy. Sondyqtan da, biz Forýmnyń kún tártibine Eýrazııa keńistigin tolǵandyratyn eń mańyzdy, eń ótkir, eń kezek kúttirmes máselelerdi qamtýǵa tyrystyq: terrorızm, Aýǵanstannan AQSh áskerıleriniń ketýinen bolatyn saldar, Taıaý Shyǵystaǵy gýmanıtarlyq, saıası, áleýmettik apattar, Sırııadaǵy azamat soǵysy. Bul qaralatyn máseleniń bir jaǵy. Ekinshi jaǵynan - «EKSPO-2017» halyqaralyq mamandandyrylǵan kórmesi, «jasyl» ekonomıkany belsendi ilgeriletý qaǵıdattary, álemdik energetıkanyń jańa baǵyttary», - dep atap ótti Darıǵa Nazarbaeva.
Sonymen qatar, ol BAQ-ty damytý perspektıvalary men HHІ ǵasyrdaǵy medıa-trend máseleleri forým baǵdarlamasynan erekshe oryn alatynyn atap ótti. «Nazar aýdararlyq dúnıe - osy jyldar ishinde bizdiń forýmnyń tarıhy jahandyq medıa-revolıýtsııasynyń damýymen birge ósti. Sońǵy 15-20 jylda spýtnıktik jáne kabeldik televıdenıeniń damýymen, ınternettiń, smartfonnyń, planshettiń keńinen taralýymen qatar, medıanaryq adam men qoǵam ómirinde osydan on jyl burynǵa qaraǵanda aıtarlyqtaı ról atqara bastady. Jalpy medıa-revolıýtsııa men jańa tehnologııalar bizdiń álemdi adam tanymastaı etip ózgertti. Bizdiń kóz aldymyzda ózgerip jatqan dúnıeler, áli de bizdi tańdandyryp keledi», - dedi D. Nazarbaeva.
