Medıa – memleketter men mádenıetter arasyndaǵy kópir – Qanat Beısek
ASTANA. KAZINFORM – «Qytaı – Ortalyq Azııa» medıa forýmy aıasynda «Qazaqstan–Azııa saýda jáne mádenıetti damytý qaýymdastyǵy» Basqarma tóraǵasy Qanat Beısek Kazinform tilshisine bergen suhbatynda kúrdeli ári tez ózgerip jatqan aqparat dáýirinde buqaralyq aqparat quraldarynyń mańyzyna toqtaldy.
Onyń aıtýynsha, zamanaýı medıanyń memleketter arasyndaǵy tatý kórshilik, mádenı baılanys jáne óńirlik turaqtylyqty nyǵaıtýdaǵy róli asa mańyzdy.
– Búgingi Qytaıdyń «Jenmın jıbao» basylymynyń bastamasymen jáne Qazaqstan Respýblıkasy Prezıdentiniń Teleradıokesheni uıymdastyrýymen Astanada ótip jatqan halyqaralyq medıaforým aıryqsha mánge ıe. Esterińizde bolsa, Qytaı Halyq Respýblıkasynyń Tóraǵasy Sı Tszınpın «ejelden kórshi elderdiń myńjyldyq dostyǵyn jalǵastyryp, Qazaqstan men Qytaı qarym-qatynasynyń jańa «altyn 30 jyldyǵyn» quraıyq» degen bolatyn. Bul rette BAQ — qos memleket qana emes, jalpy óńir elderiniń ózara is-qımylyn damytýdaǵy mańyzdy qural. Qazirgi jedel jańaratyn aqparat pen ózgeristerge toly zamanda óńir elderiniń medıasy bas qosyp, pikir almasatyn, ózara túsinistikti nyǵaıtatyn orta qajet. Qazaqstan Prezıdenti Qasym-Jomart Toqaev forýmǵa joldaǵan quttyqtaý hatynda «buqaralyq aqparat quraldary memleketter, qoǵam men mádenıet arasyndaǵy berik kópir» ekenin atap ótýi – osynyń aıǵaǵy, - dedi Qanat Beısek.
Ol bul forýmnyń Qytaı men Ortalyq Azııa medıasy arasyndaǵy dıalogty tereńdetip qana qoımaı, búkil óńirdegi beıbitshilik, turaqtylyq pen ornyqty damý isine oń serpin beretinin aıtty.
– Halyqaralyq geosaıası jaǵdaı qalaı qubylsa da, Ortalyq Azııa elderi men Qytaı arasyndaǵy dostyq pen turaqtylyq – bizdiń óńir úshin eń mańyzdy basymdyq. Osy rette medıanyń atqarar qyzmetin taǵy da erekshe atap ótkim keledi, - dedi ol.
«Bir beldeý, bir jol» bastamasyna toqtalǵan Qanat Beısek onyń negizgi ıdeıasy adamzattyń ortaq taǵdyryn qalyptastyrýǵa negizdeletinin atap ótti. Bul bastama tek ekonomıkamen shektelmeıdi.
– Bizdiń qaýymdastyq Azııa elderiniń saýdasy men mádenıetin qatar damytýdy maqsat etedi. Osy arqyly bıznes, kásipkerlik, iskerlik orta men mádenı áriptestikti nyǵaıtyp, halyqtar arasyndaǵy senimdi arttyrýǵa jumys isteımiz. Munyń ózi – memleketterdiń ıgiligine qyzmet etý, - dedi ol.
Qanat Beısektiń paıymynsha, forým aıasynda qurylǵan yntymaqtastyq alańy Qytaı men Ortalyq Azııa elderi arasyndaǵy BAQ ókilderiniń ózara senimi men birlesken jumysyn tereńdetip, óńirlik deńgeıde mádenı baılanystar men ortaq taǵdyr qaýymdastyǵyn qalyptastyrýǵa berik negiz qalaıdy.