Media quryltaı: YouTube keńistiginde qazaq tilindegi kontentke suranys artyp keledi
ALMATY. QazAqparat – Almatyda BAQ qyzmetkerlerine arnalǵan dástúrli Media quryltaı ótti, dep habarlaıdy QazAqparat tilshisi.
Medıa salanyń sarapshylary jýrnalıstıkadaǵy zań, medıa bıznesti basqarý máselelerin sóz etti.
Paneldi jıyndardyń birinde YouTube platformasynyń damýy sóz boldy.
Medıa sarapshylardyń aıtýynsha, YouTube jelisinde kanal ashqan qazir tıimdi.
«YouTube – Qazaqstandaǵy №1 telearna. Munda jaqsy qarajat tabýǵa bolady», - dedi «Salem social media» bas dırektory Aleksandr Aksıýtıts.
Onyń aıtýynsha, Qazaqstandaǵy 18 mln halyqtyń 12 mıllıony YouTube-tyń turaqty qoldanýshysy.
«Qazaqstanda balalardyń 80 paıyzy qazaq mektebine barady dedik. YouTube bıznesin damytam deseńiz, orys tilin umytýyńyz kerek. Aýdıtorııanyń basym kópshiligi qazaq tildi. Turaqty uzaq merzimdi jobalar kerek bolsa, qazaqsha bolǵany tıimdi. Podkast túsirgilerińiz kelse, qazaqsha túsirgenderińiz durys», - dedi spıker.
Al jıynǵa qatysqan jýrnalısterdiń biri, YouTube keńistiginde birneshe jobanyń avtory Aman Tasyǵan balalarǵa arnalǵan qazaq tilindegi kontentke qyzyǵýshylyq joǵary ekendigin aıtty.
Sarapshylar kórilimderdiń sanyn arttyrý, monetızatsııa máselesin kóterdi.
«Bir baǵdarlama 500 myń teńge turady. Buǵan 4 kamera, jaryq, dybys, zaldy jalǵa alý kiredi», - dedi belgili bloger Álisher Elikbaev.
«Biz Qazaqstanda qazaq tildi aýdıtorııanyń ósip kele jatqanyn baıqap otyrmyz. Qazaqtildi kontenttiń sapasy joǵary bolǵany durys», - dedi Armanjan Baıtasov.
