Medıa-konkýrs: Úzdik jýrnalıster men blogerler 1 mln teńgeden júlde alady
ALMATY. QazAqparat - Almatyda elordanyń 20 jyldyǵyna oraı uıymdastyrylatyn medıa-konkýrs jeńimpazdaryna 1 mln teńgeden beriledi, dep habarlaıdy QazAqparat tilshisi.
Konkýrsqa jýrnalısterden bólek, fotograftar jáne áleýmettik jelide jazba jarııalaıtyn blogerler de qatysa alady. Sondaı-aq, búginde Qaznette tanymal bolǵan ázil baǵytyndaǵy beınejazbalardyń avtory - vaınerlerge de baq synaýǵa múmkindik bar.
Almaty ishki saıasat basqarmasy basshysy orynbasary qyzmetin atqarýshy Erkebulan Kenjebolatovtyń aıtýynsha, joldanǵan jumystar túpnusqa bolýy tıis. Al mazmuny Astananyń áleýmettik-ekonomıkalyq damýymen baınalysty bolýy shart.
«Ómirlik sıpattarǵa ıe «vaın» atalatyn beınerolıkterge kazirgi tańda Qazaqstandyq jeli qoldanýshylarynyń qyzyǵýshylyǵy artqan. Mundaı janrdaǵy beıne jazbalar mıllıondaǵan qaralymǵa ıe bolyp jatyr. Medıaónerdiń bul túriniń qanat jaıyp kele jatqanyna kóz jumyp qaraı almadyq. Sol sebepti de konkýrs atalymyna «vaındy» qostyq. Jumystar qazaq jáne orys tilderinde qabyldanady. Bir atalym jeńimpazy birneshe adam bolýy da múmkin», - dedi Erkebulan Kenjebolatov.
Qatysýshylardyń ótinishi 15 maýsymǵa deıin qabyldanady. Konkýrs úzdik televızııalyq joba, radıo jumysy, baspasóz betterine basylǵan úzdik maqala, áleýmettik jelilerde jarııalanǵan úzdik jazba, aqparat agenttikterindegi eń úzdik jarııalanym, úzdik fotomaterıal jáne vaın atalymdary boıynsha ótedi. Júldegerlerdiń esimi aı sońynda belgili bolady.
Joldanǵan jumystar tanymal medıatulǵalar, medıaholdıng basshylary men redaktorlar tarapynan talqyǵa túsip, baǵalanady. NTK telearnasynyń aqparattyq baǵdarlamalar dırektory Ádil Lııan men vaıner Serik Shárip atalaǵan jobaǵa qazylyq etetinderin málim dedi.
«Saıysqa qatysýshy óz materıalyn qanshalyqty ashyp kórsete alǵandyǵyn, shyǵarmashylyq tásilin, eshkimdi qaıtalamaıtyn túpnusqa ekendigin tekseremiz. Meıli ol 20 jyldyq tájirıbesi bar jýrnalıst pe, óz qyzyǵýshylyǵymen túrli qyzyqty jazbalar jarııalaıtyn nemese kúlkili beınejazba túsiretin adam ba, mańyzdy emes, mańyzdysy - kreatıvke toly ári kásibı jasalǵan materıal bolýy kerek», - dedi Serik Shárip.
Araılym Joldasbaeva
